Cascos dexa la política

El Ministru de Fomentu ta acabante d'anunciar n'Uviéu qu'abandona la política. El ministru de fomentu, ún de los históricos de la vieya guardia del PP, convocare ayeri a los medios de comunicación pa una rueda de prensa na Delegación de Gobiernu n'Uviéu. La convocatoria de Cascos nun esplicaba de qué diba falar, anque la inminencia del calandariu electoral facía pensar que'l Ministru diba dar anuncia de la so presentación como númberu ún na lista del PP por Asturies. Ayeri, el secretariu de los populares asturianos, Ovidio Sánchez, entovía daba por segura la presentación de Cascos abriendo la llista popular asturiana al congresu, lo que fai entovía más chocante l'anuncia del entovía Ministru de Fomentu de retirase de la política n'activo. Cascos, que foi a la rueda de prensa acompañáu pola so nueva compañera y por dos de los sos fíos, dixo que la decisión de dexar la política yera personal dafechu y que ya-yos la comunicare al Presidente del Gobiernu José María Aznar, y al secretariu xeneral del PP Mariano Rajoy.