Carso escueye a Fernando Hierro pa liderar el proyeutu del Uviéu

L'ex central malagueñu nun cuenta con esperiencia como primer entrenador.

Dende última hora d'ayeri difundíase la noticia, qu'esta mañana confirmaba'l club: Fernando Hierro va ser l'entrenador del Uviéu pa la próxima temporada. El mexicanu Joaquín del Olmo, persona de confianza del Grupo Carso na sociedá, anunciaba'l sábadu la llegada d'un téunicu "de primer nivel", con dos opciones preferenciales, y pese a que munchos rumores apuntaben a Joaquín Caparrós como'l meyor posicionáu, l'escoyíu finalmente foi l'ex futbolista del Valladolid y Real Madrid.

Hierro, ún de los meyores centrales de la historia del fútbol estatal, nun cuenta con esperiencia como primer entrenador, motivu pol que crea dalgunes reticencies ente un sector de l'afición. El so únicu pasu per un bancu foi como segundu de Carlo Ancelotti na temporada pasada nel Madrid hasta la destitución del italianu. Enantes, ocupara la direición deportiva de la seleición española (2007-2011) y del Málaga mientres la temporada 2011-2012.

El malagueñu, de 48 años, firma pol Uviéu por una temporada, con opción a una segunda. “El proyeutu que m'ufre'l Real Oviedo ilusióname al máximo, por tolo qu'esti club representa nel futbol nacional, con una tradición y afición de Primera, y la estabilidá que supón el respaldu absolutu d'Arturo Elías y el Grupo Carso”.

Pela so parte, la cabeza visible de Carso afirmó que "depués de falar con Fernando convencíme plenamente del gran valor que va aportar al proyeutu col que'l Grupo Carso comprometióse, a mediu y llargu plazu, nel Real Oviedo. L'aportación de Fernando Hierro al proyeutu será integral, dende les fuercies básiques hasta la máxima esixencia que supón dirixir al primer equipu oviedista. El mio compromisu nel Real Oviedo sigue intautu. Como dixi dos años atrás, tando en Segunda División B, la intención ye devolver al equipu a Primera División nun plazu de trés a cinco años. Tamos nel añu unu. Y toi seguru de que Fernando ayudarános a algamalo”.