Carreño gana a Medvédev en dos sets y caricia los metales

|
Pablo Carreño partíu con Medvédev

El númberu 2 del Mundu desesperó énte'l bon xuegu del xixonés, que va tener como rival a Khachánov. El combináu de ḥoquei yerba de María López, a un pasu de cuartos.

Pablo Carreño yá ta en semifinales de los Xuegos Olímpicos de Tokiu. El tenista formáu nel Real Grupo de Cultura Covadonga, que vien de ganar un ATP 500 n'Hamburg, ta faciendo un xuegu espléndidu que se confirmó esta mañana, tarde en Xapón, nel partíu contra Daniil Medvédev.

Salió mui bien a la pista'l xixonés, imponiendo'l so tenis al rusu, que se vio superáu en too momentu. Col 6-2 nel marcador, Medvédev trató de destabilizar a Carreño marchando pa vestuarios per más de 8 minutos, dalgo que de primeres nun consiguió, al llevar l'asturianu el primer puntu, pero llueu'l moscovita reacionó.

Nunca baxó los brazos Carreños énte'l meyor momentu del so rival, y llueu de consiguir igualar 4-4 tornó a garrar el mandu del partíu magar que Medvédev se caltuviera fuerte nel so saque. Nel tie break siguió llevando la iniciativa hasta superalu por 7-5 y ganar el partíu por 6-2 y 7-6 en 1 hora y 42 minutos.

Espera agora en semifinales, mañana a les 8 hores (15 hora llocal), otru rusu, nesti casu d'orixe armeniu, Karén Khachánov, númberu 25 del ranking ATP, que derrotó al francés Ugo Humberto por 7-6, 4-6 y 6-3. La otra eliminatoria va xugala'l serbiu Novak Djokovic, el gran favoritu pal oru, y el ganador del partíu ente Alexander Zverev y Jeremy Chardy.

Victoria énte China

La seleición española de ḥoquei yerba ganó a China por 2-0, con goles de Bonastre y Beatriz Pérez, y da un reblagu nel so camín a cuartos de final. Al equipu capitaniáu por López queda-y xugar con Xapón, el sábadu a les 3 hores (10, hora llocal), con too a favor pa pasar.

Otra manera, el combináu de balonmano de Raúl Entrerríos xuega mañana a les 7.15 hores (14.15, hora llocal) contra Francia nun partíu pol lideratu del grupu. Entrambos conxuntos sumen 6 puntos al ganar los 3 choques xugaos.

Contador Estadistiques