Carlos Madera espeya la incógnita de Cultura

El Conseyu de Gobiernu de mañana xueves va dar de pasu'l nombramientu de Carlos Madera como Director Xeneral dePromoción Cultural y Política Llingüística en sostitución d'Ana Navarro, colo que va resolvese una de les incógnites más esperaes pol asturianismu nel organigrama del executivu autonómicu.

Carlos Madera, nacíu n'Uviéu en 1957, tien la carrera de médicu y foi n'anterior llexislatura Director Xeneral de Servicios Sociales, cargu dende'l que tuvo bien de rellación cola emigración asturiana. Precisamente del Congresu Mundial de la emigracion asturiana que se fizó l'otru añu n'Uviéu son les úniques declaraciones públiques que se tienen d'elli sobre l'asturianu "Nuestra cultura autóctona estaría coja si no se tuviera en cuenta la riqueza antropológica inmensa que supone disponer de una lengua propia (...) Se pretende así mantener y extender el conocimiento del bable y luchar para preservarlo, a sabiendas de que nuestra sociedad ha maltratado históricamente nuestra lengua y durante mucho tiempo no supo darle el valor que merece".

El director xeneral de Cooperación y ún de los pegoyos asturianistes de la coalición de gobiernu, Rafael Palacios, foi la única fonte consultada por Asturies.com que fizo declaración oficial sobre'l nuevu cargu, del que dixo que ye una persona a la que recibe "con espectación y espectatives" y al que ve positívamente en cuantes que lu ve persona dialogante y porque yá se pronunciare delles vegaes al favor del alcuerdu de gobiernu. Sicasí, Palacios sorrayó qu'entovía queden por dar los cargos de la Oficina de Política Llingüística, dependiente d'esta Dirección, xunta dellos puestos secundarios más que van tener tamién rellación directa cola política llingüística

Otramiente, nin la Xunta Pola Defensa de la Llingua nin l'Academia de la Llingua, acabantes de conocer la noticia del nombramientu, tienen entovía valoración oficial que facer sobre la figura del que va ser, de mañana en p'alantre, nuevu Director Xeneral de Promoción Cultural y Política Llingüística.