Carapaz fai historia na Vuelta a Asturies al repetir trunfu

|
Richard Carapaz

El ciclista ecuatorianu del Movistar ye'l primeru en ganala dos años siguíos.

Una exhibición de Richard Carapaz y del so compañeru Mikel Landa en L'Acebu sirvió-y al sudamericanu pa repetir trunfu na Vuelta a Asturies. Dambos coronaron l'altu xuntos y llegaron tamién xuntos a la meta de Cangas na segunda de les trés etapes de la carrera, dexando'l vascu la victoria a Carapaz sabiendo qu'al día siguiente nun diba a tomar la salida por unes molesties nuna uña del pie de la que quier curar de cara al Giro, primera gran vuelta de la temporada, que comienza'l sábadu y na que va tomar parte l'equipu completu del Movistar que compitió n'Asturies.

Ayeri, na etapa final, con meta n'Uviéu y pasu per El Violéu a falta d'ocho quilómetros, el Movistar namái tuvo que controlar la carrera pa garantizar la victoria del ecuatorianu. Asina, Carapaz llevó la xeneral con 2 minutos de ventaya col letón Krists Neilands, del Israel Cycling Academy, y 2.04 con respeuto al rusu Aleksandr Vlasov, del Gazprom-Rusvelo, que completaron el podiu.

El combianu Carlos Julián Quintero, del Manzano Postobon, ganó al sprint la primer etapa, mentes que na tercera'l vencedor foi'l portugués Edgar Pinto, del W52-FC Porto, nuna llegada mui rápida na que sacó 4 segundos a un grupu encabezáu pol propiu Quintero, que finó segundu.

Contador Estadistiques