Cangas va dedicá-y la selmana Cultural a Xosé María Flórez

L'Ayuntamientu de Cangas del Narcea va dedicá-y la tercer edición de la so selmana cultural, que va facese ente'l 22 y 26 de marzu, al escritor Xosé María Flórez y González, autor de cantares y romances n'asturianu occidental y estudiosu del patrimoniu arqueolóxicu.

Ñacíu en Cangas del Narcea en 1830 y muertu en 1890, Xosé María Flórez foi director de la Escuela Normal Superior de Maestros d'Uviéu y foi miembru correspondiente de l'Academia de Bellaes Artes de San Fernando, escribiendo estudios d'arqueoloxía ente los que rescamplen el que-y dedicó a la ilesia prerrománica de Santullanyu y al castru de Cuaña. Como escritor, nel 1883 espublizó "Composiciones en dialecto vaqueiro".

El programa d'actos previstu inclúi un repás al llabor lliterariu de Flórez y tamién a los sos estudios sobre los castros y los vaqueiros d'alzada. La selmana entama esti llunes 22 cola conferencia a les 8 y media de la tarde d'Antón García sobre la obra lliterario de Flórez. El martes, nel Teatru Toreno, a les 20.30 horas, conciertu del cantautor Rafa Lorenzo, que tien compuestos dellos cantares sobre les poesíes vaqueires de Flórez. La selmana sigue'l miércoles cola charra del arqueólogu David Flórez sobre los castros de Cangas del Narcea, mientres que'l xueves va ser pal teatru cola representación n'asturianu del Ricardo'l Terceru de
Bacanal Teatro. La selmana va echar el piesllu'l vienres cola conferencia del profesor Adolfo García sobre los vaqueiros d'alzada.