Cangas quier remocicar el sector del miel

La Conceyalía de Mediu Rural del Conceyu de Cangas del Narcea entamó de recién los trámites y negociaciones necesarios pa conseguir una marca de calidá pal miel del conceyu. Cangas del Narcea produz tolos años ente 25.000 y 30.000 kilos de miel, de lo qu'ensin dulda podría sacase un meyor rendimientu comercial si lo guardare daqué etiqueta de calidá. El conceyal de Mediu Rural, Samuel Areces, anda agora tres de los productores con vistes a montar una asociación na que participen ellos y que seya la que xestione toles iniciatives nesti sentíu.



Según los datos del sector del añu 2003, el total de truébanos censaos en conceyu anda sobre los 1.800, y cada truébanu dio 25 kilos en casu de tener reines d'un a tres años d'edá, baxando a 15 kilos nos que teníen reines del añu. Esti 2.003 tampoco nun foi mal añu apícola nel conceyu de Cangas. La bona primavera que vieno afaló'l desarrollu de las colonies, pero el fríu y la borrina del mes de xunetu acabaron cola campaña de miel de castañal, recuperándose la situación a primeros d'agostu p'acabar l'añu con una campaña curiosa na que lo que más abonda ye'l miel de bericiu de mui bona calidá