Cangas del Narcea completa la recoyida de la basura

La recoyida de la basura en conceyos grandes ye xera abegosa. Valga con dicir que Cangas del Narcea, el conceyu más grande d'Asturies, produz tolos años cinco mil ochocientes tonelaes de basura, volume que se reparte ente les 282 parroquies y llugares del conceyu, qu'albarca enteru 823 kilómetros cuadraos. L'espardimientu de los llugares y parroquies del conceyu obliga a los camiones de la basura a facer tolos años cerca de 52.000 kilómetros pa pañar la carga de los contenedores.

La estadística esmuz el que metíos como tamos nel sieglu XXI, entovía quedaben hasta esta selmana venticinco entidaes de población en Cangas onde nun se recoyía la basura, xenerando un problema grande de vertederos illegales y llevando a qu'armarios, electrodomésticos vieyos y cacharros vieyos de toa triba estraren el monte. L'Ayuntamientu de Cangas, que tolos años paga a Cogersa 35.000 euros pola recoyida, ta acabante de poner más de noventa contenedores nuevos colos que'l serviciu llega agora yá a cásique'l 100% de los núcleos poblacionales de Cangas.