Campos de golf na costa asturiana

La Comisión d'Urbanismu y Ordenación del Territoriu d'Asturies (CUOTA) dio de pasu ayeri'l Plan d'Ordenación del Litoral Asturianu, POLA, un documentu que lleva dando vueltes pelos despachos dende l'añu 2.001 y qu'agora va pasar al periodu definitivu d' información público. El POLA ñaz oficialmente col enfotu de caltener y dinamizar la costa, y nel so documentu previu presentábase como "instrumentu de desarrollu sostenible qu'axunte intereses enfrentaos, la xestión de les trés alministraciones y socialice la costa permitiendo un disfrute públicu ensin degradar el mediu" El POLA contempla actuaciones nueves sobre playes, creación de caminos pa peatones y paseos, cambeos na rede viaria y creación d'aparcaderos y una zonificación urbanística nueva dafechu. D'otra manera'l POLA inclúi tamién trabayos de recuperación de llugares degradaos, un tratamientu especial pa les llinies d'alta tensión que pasen pela costa, un plan d'ordenación de yacimientos arqueolóxicos y otru pa los campings que tan en llinia costera.

Ente los argumentos colos que se presentaba'l POLA, la Conseyería emponderaba'l so valor como un instrumentu de desarrollu sostenible qu'axuntare intereses opuestos y consiguiere una "socialización de la costa" permitiendo un disfrute públicu de la mesma ensin degradar el mediu.

Yá de la que se presentó'l Plan, los ecoloxistes de la Coordinadora Ecoloxista d'Asturies dieron l'alarma. Según el grupu conservacionista, el principal oxetivu del Plan yera'l de xubir la presión humana, y sobremanera la turística, en tola costa. Les idees que s'enxertaben na presentación previa del plan merecíen toes elles crítiques, entamando pola de facer aparcaderos allegaos a les playes. Lo que pa la Conseyería yera la meyor manera pa desaniciar la presencia d'automóviles atiestando cola arena, pa los ecoloxistes yera una manera d'afayar l'accesu de más de 5.000 coches (tantos como places d'aparcaderu) a les playes, que pasaben a enxertase bien d'elles en "Parques-Playa" una categoría nueva que recibía tamién la crítica verde. Nesti casu, lo que yera una manera d'amestar usos tradicionales con usos d'ociu y espardimientu yera pa los otros una propuesta p'atacar de turistes un total de más del 10% de les playes asturianes, delles hasta agora virxes y que tendríen qu'aguantar una presión humana cada vegada mayor.

La construcción de xales y viviendes arreyaes a estos nuevos parques-playa apaecía polo tanto como ún posible efectu secundariu de la masificación turística. Nesti sentíu, el POLA reconocía esta xuba de la presión urbanística y dicía que se tentaría facer un diseñu urbanísticu amañosu que concentrare les construcciones nueves en llugares yá edificaos y mirando que'l volume a edificar tuviere'l menos impactu visual posible. Lloñe d'una llectura conservacionista del espaciu, la revista Inmoley, nel so analís del POLA vía una puerte abierta a incrementos d'edificabilidá, en cuantes que'l POLA diba permitir a los conceyos camudar la calificación de núcleos rurales a la categoría d'asentamientos de baxa densidá, categoría qu'autoriza a la construcción de cases separtaes y viviendes unifamiliares.

Xunta too esto, el Viceconseyeru d'Infraestructures y Ordenación del Territoriu, Francisco González Buendía, dio anuncia ayeri d'otra de les acciones que va afalar el POLA dientro d'ún de los sos oxetivos cimeros: l'aprovechamientu deportivu de la costa asturiana. Pa ello, a parte de poner amarraderos pa barcos de recréu en tolos llugares en que se pueda, el POLA va afalar en primer llinia de costa la construcción de campos de golf, un deporte que, según Buendía yá nun ye elitista y que concueya perfectamente col oxetivu de protexer el mediu ambiente.