Cambeos pa l'angula

El Director Xeneral de Pesca de la Conseyería de Mediu Rural y Pesca d'Asturies, Alberto Vizcaíno, púnxose la otra selmana en contactu col Ministeriu d'Agricultura, Pesca y Alimentación pa ponelu en conocimientu de la preocupación énte'l plan d'actuación comunitariu pa la xestión de l'angula que propón Bruseles. Pesca pretende que Bruseles comprometa ayudes en casu de que la normativa nueva obligue a dexar l'actividá a los pescadores.



Nel añu 2002 la temporada d'angula acabó con 2.770 kilos, un volume de captures qu'abulta pequeñu, sobremanera si se reparte ente les 200 llicencies profesionales pa la pesca de l'angula (55 con barcu y 145 pa pescar dende la oriella) pero l'angula, que se pesca sobremanera na ría del Nalón y en Ribeseya, tien un preciu que compensa lo probetayo de la pesca. Hasta 200 euros pue llegar a rulase'l kilu d'angula, un pexe que, sacantes dellos repuntes, tien cada vegada menos presencia nos ríos asturianos. La normativa europea quier precisamente torgar esa mengua de la especie.



En collaboración col Ministeriu de Pesca, y pa conocer l'estáu en que ta la especie la Dirección Xeneral de Recursos Naturales va unviar los datos de captura d'anguila y los datos sobre les torgues qu'alcuentren anguiles y angules al xubir y baxar los ríos.