Caltiénse la escalada de contaxos: 239 el xueves

La selmana arrancó con 66 casos nuevos y la media diaria la selmana pasada foi 55.

La pandemia de COVID-19 n'Asturies paez próxima a descontrolase, col aliviu que supón la baxa presión hospitalaria gracies a la vacunación. Si'l llunes la Conseyería de Salú comunicó 66 contaxos, el martes está cantidá aumentaría a 140 y el miercóles a 165 por causa de viaxes d'estudiantes y folixes protagonizaes mayormente por xente mozo, una dinámica que se confirmó ayeri colos 239 positivos anunciaos –l'actualización aumenta la serie total en 248–.

Ye la cantidá más alta dende'l 11 de febreru, cuando tán rexistraos 251 casos nuevos –nun primer momentu informáronse 249–. Mentes, la incidencia acumulada a 14 díes pasaba'l miércoles de 85,7 a 98,45 casos por cada 100.000 habitantes, cola previsión de que supere ampliamente los 100 na actualización de los datos oficiales –asitióse en 115,63–.

Tasa de positividá diaria del 10,91 por cientu

Fixéronse 2.227 pruebes de de diagnósticu d'infeición activa, polo que la tasa de positividad s'asitió nel 10,91 por cientu, superando el 7,68 por cientu de la xornada anterior. A 7 díes esti porcentaba taba'l miércoles nel 5,22 por cientu –ayeri xubió al 6,15 por cientu–, superando per primer vegada en selmanes el 5 por cientu que marca la Organización Mundial de la Salú (OMS) como referencia a partir de la que s'empieza a perder el control de la pandemia.

Nun hebo que llamentar muertes, polo que'l total de finaos nel andanciu sigue en 1.980. Les hospitalizaciones en planta con confirmación o sospecha de COVID-19 baxaron de 37 a 33, mentes que na UCI siguen 11 pacientes.

Na semeya, una persona recibe la vacuna nel pabellón xixonés de Pechera-La Braña na ventana abierta pol SESPA p'alministrar el preparáu a los ciudadanos mayores de 70 años colos que nun se pudo contautar o refugaron recibila nel so momentu.