Caen les bolses, y nun ye por culpa la guerra

Selmana de cayíes nes bolses nun tiempu en que ta faciéndose realidá la mala traza que presentaben los datos macroeconómicos. Dempués d´un pequeñu rally alcista de tres selmanes los inversores punxéronse la selmana pasada a pañar beneficios. Los mercaos europeos tuvieron cayies moderaes, lo que supón una corrección técnica a les esaxeraes xubes de les últimes selmanas. Nel pieslle del vienres pasáu el selectivu Ibex asistióse nos 6.492,50 puntos, lo que ye una baxada del 1,25% nel conxuntu na selmana. El volume de negociu nel parqué madrilanu siguió baxo mínimos, con sólo 1.000 millones d´euros negociaos el vienres pasáu.



Ensin dulda, el pior datu económicu de la selmana pasada foi´l crecimientu d´Estaos Xuníos. El menor crecimientu del PIB norteamericanu ye la confirmación de la permala traza que lleva la primer economía del mundu. Anque ya la OCDE y el Llibru Beige de la Reserva Federal dieron anuncia hai tiempu del riesgu de crisis económica nos EUA, agora con esti datu tan señeru los inversores entamaron rápidamente a recoyer los beneficios de les últimes selmanes. A tolos inversores y analistes nun-yos prestó esti datu que ye un avisu de que entovía nun hai recuperanza económica. Nel últimu trimestre el PIB norteamericanu xubió un 1,6%, (l'ún por cientu menos del 2,6% que pensaben dellos analistes financieros). Pero nun ye solo un baxu crecimientu económicu sinon que´l consumu nos Estaos Xuníos anda feble. El consumu norteamericanu ye´l verdaderu motor del país y anguaño ta cada vegada con menos puxu. Sin dir más lloñe la venta de coches nos Estaos Xuníos tuvo una perimportante cayida.

L´Ibex baxó un 0,53% el vienres pasáu, anque foi la minor cayida ente les places europees. Agora L´Ibex perdió la barrera de los 6.500 puntos colos que se pierde un puntu de referencia psicolóxica pa los inversores perimportante. L'índiz xeneral de la bolsa madrilana baxó un 0,55% p´asistiáse nos 673.89 puntos. Asinamesmo el índiz Nuevu Mercáu tuvo una cayida del 1,88% p´algamar los 1.590,40 puntos.

Ente los valores de la Bolsa de Madrid que más puxu tuvieron la selmana pasada destacaron Gas Natural y Ferrovial. Estos valores continúen col so particular rally alcista ante la especulación que hai alrodiu el sector elléctricu y gasísticu n´España pal primeru, y la consideración de valor refugu d´inversores pal segundu. Otramiente, nun foi una bona selmana pal sector bancariu que vió como los valores cabezaleros del sector tuvieron importantes cayíes. BBVA, SCH, Endesa, Respsol pesllaron la selmana con cayíes perbaxo'l 1%. Sogecable y Arcelor foron les que más baxaron el vienres pasáu, un 3,7% caún. El grupu Telefónica nun tuvo una bona selmana al tener descensos xeneralizaos nos valores del grupu. Zeltia foi la protagonista'l vienres al presenta-yos a los inversores el resultáu del primer trimestre d´esti añu, nada menos qu'una baxada nel beneficiu netu del 87% que echó abaxo les acciones de la biotecnolóxica gallega.

L´euru ye´l más beneficiáu de la feble economía norteamericana. De fechu la moneda europea ganó la selmana pasada un 1,5%, y namás-y queda ganar una migayina más p´algamar la cotización másima de 1999. Agora l´euru val 1,0973 dólares. El barril brent cotiza ya nos 24,35 dólares. El mercáu de renta fixo ta a la espectativa de la posible rebaxa de tipos na Zona Euru.