Buques peligrosos nos puertos asturianos

Mentanto sigue llegando galipote a la costa asturiana, nos puertos asturianos aporten barcos asemeyaos al Prestige. Según informa Ecoloxistes n'Aición d'Asturies nel so web, el buque ALCUDIA ta descargando 13.000 Tm. de gasoleu y gasolina nel puertu d'El Musel. Dase la circunstancia de qu'esti buque foi espulsáu del Mediterraneu por nun cumplir la normativa ellaborada dempués del fundimientu del Prestige.

Esti nun ye l'únicu casu de buques problemáticos nes costes asturianes. Ta nel puertu d'Avilés el buque Camarón, que vien d'Amsterdam y con destín a Huelva dempués de cargar n'Avilés ácidu sulfúrico. Esti buque tenía enantes el nome de Metilo y ya foi deteníu en dos ocasiones nos últimos años y tien detectaes hasta 42 deficiencies nes inspecciones feches. El fechu de cambiar los nomes y les banderes de los buques ye una falcatrúa de navieros pa safase los controles de seguridá.