Bual fai unes xornaes sobre la emigración

El Conceyu de Bual celebra les xornaes "La Emigración y les Sociedaes d'Instrucción" que consten de ponencies a cargu de prestixosos profesores universitarios y tamién esposiciones paraleles sobre la importancia de la emigración a ultramar nesti conceyu del occidente asturianu. Asina, mañana van falar la profesora universitaria Carmen Bermejo Lorenzo cola ponencia "La emigración y su legado patrimonial" y el xeógrafu Moisés Llordén, que va esponer la historia de les asociaciones asturianes en Cuba. Ana Fernández García de la Universidá d'Uviéu remata la xornada con "Martínez y Peláez, boaleses con éxito en Argentina".

Nes xornaes, que duren hasta'l 28 d'esti mes, tien un papel mui importante l'antigua Sociedá de Naturales del conceyu de Bual, una entidá que tenía más de 900 socios y que llegó a editar una revista "El Progreso de Asturias" que foi publicación de referencia de la comunidá asturiana en Cuba nos años 20 del sieglu pasáu, mientres que n'Asturies, los naturales de Bual patrocinaron la construcción de 21 escueles, ente otres obres sociales. La influyencia tan grande de la emigración na historia de Bual conozse en que, cuando a mediaos del sieglu XX foi menguando'l sofitu económicu qu'apurríen los emigrantes, el conceyu entró nuna fuerte fase de decadencia. Más información na web del Conceyu de Bual