"Xuntos vamos algamalo" ye'l mensaxe del gaiteru de Perlora nun videu grabáu en numberoses llocalizaciones del país.
La ponte de Cangues d'Onís, la plaza'l Marqués de Xixón, la Cámara Santa d'Uviéu, el Cabu Peñes o'l campu la Garita de Cadavéu son dalgunos de los escenarios nos que se pue ver a Bras Rodrigo xunto a la so gaita interpretando l'himnu d'Asturies. Sobreimpresionáu, un mensaxe: "Juntos lo conseguiremos/Xuntos vamos algamalo".
El videu termina con una imaxe de la bandera del país y un "¡Puxa Asturies!". D'esta manera l'autor de 'Remanecer', discu que va salir próximamente a la lluz, pretende unviar un menxase d'ánimu a toles asturianes y asturianos nestos momentos complicaos por cuenta la pandemia de COVID-19.
La Fundación Almastur, que naz pa la "defensa, espardimientu, estudiu y divulgación de la cultura asturiana en toles sos manifestaciones", va presentase a nun tardar en sociedá. Carlos Rubiera, presidente del so Patronatu, esplicaba va unos meses a Asturies.com esta iniciativa.
