Bon entamu de setiembre nes bolses

Los inversores tornen con fuercia dempués d´un veranu tranquilu nos mercaos bursátiles. El volume de negociu esperimenta una perimportante xuba mentantu la comunidá inversora entama a preparar la cartera de valores de cara´l pieslle d´añu. El pieslle del vienres pasáu foi bien feble poles duldes nes cifres macroeconómiques, y anque l'Ibex pieslló la selmana en positivo, l'entusiasmu de los inversores mengüó según pasaba la selmana.

Ente les estadístiques más señeres de la selmana, rescampla'l mal datu llaboral al otru lláu del Atlánticu. El paru nos Estaos Xuníos medró hasta'l 8,1% confirmando una peligrosa destrucción d´emplegu que llega a los 93.000 puestos de trabayu cuando los economistes contaben cola creación de 20.000 empleos. Esti datu disparó toles alarmes nos mercaos internacionales énte la posibilidá de retrasu na recuperación de la economía norteamericana. Otramiente, la producción industrial n´Alemaña medró un 0,5%, bon datu cuando s´esperaba una cayida d´un puntu. Les estadístiques del PIB de la Xunión Europea indiquen que´l prósimu añu nun va ser munchu meyor qu´esti, sobremanera por culpa del endeudamientu públicu de Francia y les perdes d´emplegu d'Alemaña

N'España, l'Ibex sigue en másimos anuales y lleva tola traza de dir a terminar l'añu en positivo trés de tres probetayos años calterizaos poles perdes. El vienres pasáu el peslló nos 7.230,60 puntos, siendo la xuba nel conxuntu de la selmana del 1,67%. L´índiz xeneral de la Bolsa de Madrid trancó nos 762,36 puntos con una xuba del 1,66% y l´índiz Nuevu mangóse nos 1.924,60 medrando un 3,92%.

Per empreses, bona selmana pal Grupu Telefónica, onde la matriz caltién los 11 euros per acción y cuenta con xubir a esgaya nos prósimos meses. El restu de les empreses del grupu pesllaron tamién en postivo, con xubes penriba´l 2,6% sacantes la filial d´Internet Terra. Bona selmana tamién pa Indra, beneficiada por un contratu millonariu col Minsteriu de Defensa. Ente les estrelles bursátiles de la selmana pasada tan Sogecable, Arcelor, Unión FENOSA, Amadeus, Iberia y Sacyr Vallehermoso, con xubes d'ente´l 3,70% d´Iberia y el 8,27 de FENOSA. Nel lláu de les perdes, permala selmana pa la empresa d'Amancio Ortega, Inditex, dañada por un escándalu de contrabandu testil en México. Malos resultaos tamién pa ENAGAS, Altadis, Iberdrola y REE. Ente les noticies de la selmana destaca el ruiu de movimientos corporativos sobre Hidrocantábrico, onde'l futuru pinta agora más portugués que nunca. Tamién esta selmana pasada falose de la fusión d'Uralita cola so filial Aragonesas.

Nel pieslle del vienres pasáu tanto les bolses europees como Wall Street cayeron con fuercia pol mal datu llaboral norteamericanu. Les duldes tornaron al parqué y los inversores entamaron una recoyida de beneficios dempués de delles sesiones con xubes importantes. Sólo la Bolsa de Londres peslló con un positivu 0,9%. A la contra, Francfort foi la bolsa europea que tuvo una mayor cayida. En Wall Street l´índiz trancó nos 9.503,34 puntos con una cayida'l vienres pasáu del 0,88%. L´índiz tecnolóxicu Nasdaq peslló l'últimu día de la selmana pasada nos 1.858,12 con una cayida del 0,57%.

El preciu del petroléu estabilizó en 27,30 dólares barril. La baxada del oru prieto ye una bona anuncia pal sector enerxéticu y pa los precios. Pela so parte, l'euru tuvo una xuba del 1% hasta mangase nos 1,10 dólares. Los malos resultaos nos Estaos Xuníos tan tirando pela moneda europea. Dellos analistes interpreten esta xuba de la divisa europea como un repunte técnicu dientro de la cayida llibre que lleva dende qu'entamó'l veranu.