Bloque-UNA esixe a Salú que dea esplicaciones pol casu de discriminación a una lesbiana

El casu que fixo públicu Xega d’una muyer a la que-y negaron el tratamientu pa ser madre pola so condición sexual llevó al Bloque-UNA a esixir esplicaciones. Palacios señala qu’esta postura “nun tien cabida nuna sociedá civilizada y democrática”.
 
El coleutivu que representa a les lesbianes, gais, transexuales y bisexuales d’Asturies denunció la selmana pasada’l casu d’una muyer de Mieres a les qu’un inspeutor de prestaciones del hospital negó-y el tratamientu pa ser madre pola son condición sexual, según afirmen dende Xega. Al paecer, el téunicu respondió-y que si nun hai un varón estéril y ella nun lo ye tampoco, nun hai nenguna causa pa qu'acceda a esti tratamientu, lo que llevó a la mierense a solicitar una reunión col conseyeru de Salú, José Ramón Quirós, pa tresmiti-y la so quexa. Rafael Palacios, candidatu de la coalición Bloque por Asturies-Unidá Nacionalista Asturiana (UNA) a les eleiciones, mostró’l so sofitu a esta persona y esixó a la conxeyería de Salú que “esplique la situación de la muyer” porque en casu de suspendese esi tratamientu pola so orientación sexual “taríamos falando d'una evidente discriminación que nun puede tener cabida nuna sociedá civilizada y democrática”, afirma.
 
Dende Bloque-UNA tamién se llamenta que, de confirmase los fechos denunciaos por Xega, la persona discriminada nun foi atendida por “nenguna de les instancies a les qu'allegó, inclusive cuando éstes reconocieron qu'esa forma d'actuar nun se correspondía col funcionamientu establecíu pa un supuestu de reproducción asistida” ensin que naide s'esmoleciera polo visto “de conocer por qué se producía esa situación anómala que supondría dexar a medies un tratamientu llargo y costoso, amás de duru pa la persona que lu fai”. Por ello, Palacios demanda saber qué midíes va tomar Salú de confirmase esta discriminación y critica que, nestos casos, l’Alministración “siempre actúa a posteriori, cuando se faen públicos o cuando se convierten n'escándalos”.
 
“La llucha pola igualdá real independientemente de la orientación sexual sigue bien llueñe de ser una realidá na Alministración Pública”, lo que Palacios considera “especialmente grave porque tendría de tener una clara función pedagóxica pa la sociedá y sicasí siguimos viendo postures claramente discriminatories, basaes na orientación sexual de les persones”.