Bloque-UNA d’Uviéu apuesta por un usu sostenible del agua y la lluz nel conceyu

Fernando Ornosa, candidatu de Bloque por Asturies-Unidá Nacionalista Asturiana (UNA) a l’alcaldía d’Uviéu, defende un usu sostenible del agua y de la lluz nel conceyu y asegura que’l so partíu nun se va quedar namái en declaraciones d’intenciones nel tema mediuambiental. Ente les sos propuestes tán el fomentu de la enerxía solar, la reducción de los puntos de lluz y l’usu d’agua reciclao.
 
“Na coalición Bloque por Asturies-UNA camentamos qu’en tiempos de crisis el respetu al mediu ambiente va más allá de la recoyida selectiva de basoria puerta a puerta de cara a la galería. Ensin dexar de valorar de forma positiva lo qu’una bona política de reciclaxe supón pa la sociedá carbayona y pal conxuntu d´Asturies, nun podemos renunciar a poner de manifiestu que nesti conceyu esi supuestu respetu al mediu ambiente quédase namás que neso”, señala Ornosa. Por ello, asegura que la coalición nacionalista va pasar de “una política de declaración d’intenciones” que representa l’alcalde actual de la ciudá, Gabino de Lorenzo, a una “política de fechos” centrada en dos cuestiones: “el despilfarru del agua potable pa llimpieza na cai dexándolo too llimpio-rellimpio y el derroche d´enerxía nel allumáu públicu”.
 
Ente les propuestes que cita Bloque-UNA nesi sen ta’l fomentu de la enerxía solar en viviendes unifamiliares y núcleos rurarales, amás del so usu nes instalaciones municipales pa los servicios básicos de lluz y agua caliente; la puesta en marcha d’una campaña de concienciación ente comerciantes y responsables de centru d’ociu empobinada al aforru d’enerxía; la reducción de los puntos de lluz y baxada de la intensidá del allumáu d’edificios públicos y edificios singulares de la ciudá; el recurrir al usu d’agua reciclao con un control del tipu de productos que s’amesten con esti llíquidu pa la llimpieza de cais; y l’usu d’agua de forma racional y non como sustitutu de la escoba.