Benjamin Noval, al US Postal

El pasu de la Vuelta Ciclista a España per Asturies dexó más noticies de lo que se contaba. Si no deportivo la carrera franció dafechu coles diferiencies que se sacaron nel ascensu al Altu d'El Fitu, primer puertu de tola carrera, nel tarrén estradeportivu, el parque zarráu de Xixón dio pa dellos bilordios, ente ellos en referencia a ún de los corredores asturianos presentes na preba.

El protagonista de la noticia ye l'asturianu del Relax-Fuenlabrada Benjamín Noval, al que tolos comentarios a la llegada a Cangues d'Onís poníen corriendo l'añu qu'entra nel US Postal, l'equipu de Lance Armstrong nel que tamién cuerre l'asturianu Chechu Rubiera. Dellos medios europeos yá dan por seguru'l fichaxe del ciclista mierense pola escuadra americana, qu'esti añu ganó'l quintu Tour con Lance Armstrong

Cola temporada yá pa finar, bien de ciclistes entovía nun tienen bicicleta en que montar pal añu qu'entra. La desapaición de la ONCE y del iBanesto, escuadres que queden -de momentu- ensin patrocinador pal añu qu'entra, pue dexar en paro a bien de corredores, dellos de lo meyor del pelotón mundial. Ye por ello que'l fichaxe de Noval por un equipu de tantísima categoría garra entovía más importancia. Sicasí, la cosa tien otra vuelta, y ye que'l US Postal ye un equipu fechu a la imaxe y necesidá d'una sola figura, la de Lance Armstrong. Con cinco trunfos nel Tour, la carrera del americanu yá va tiempu que pasó pel so ecuador, y, en casu d'entrar en declive, sedría bien fácil que los patrocinadores-y retiraren el sofitu a la escuadra.

Noval, que nació en Mieres en 1979, ye ún de los meyores ciclistes de la so quinta, rescamplando definitivamente del restu'l pelotón nesti tercer añu que lleva como profesional al quedar terceru nel Campeonatu d'España de fondu en carretera y ser cuartu nel Campeonatu d'España escontra-reló, ello xunta'l 6º puestu absolutu que consiguió na Volta a Catalunya.