Befesa merca l´asturiana Sistemas Aguapresión

Befesa, compañía que cotiza na Bolsa de Madrid, ta acabante de mercar la empresa asturiana de xestión de residuos Sistemas Aguapresión, S.L.. La compañía asturiana, con munchu prestixu en llimpieza industrial y tratamientu de residuos, siendo la primer empresa asturiana con autorización pal tratamientu de residuos peligrosos. Con esta compra Befesa, filial del grupu Abengoa, ponse nel camín de convertise nel llider del mercáu de xestión de lodos y residuos industriales n'orixe. Befesa, que nun ta llevando un bon añu, según los resultaos del primer semestre, qu'espeyen una cayida del beneficiu neto penriba´l 40%, taba necesitada d'una compra como esta, que ye de les que s'amorticen bien luego, en cuantes que la empresa asturiana ye de les más competitives del sector.



Aguapresión asítiase nel conceyu de Carreño, na zona industrial de Tabaza y calterízase pola innovación en sistemes de llimpieza industrial. Fundada nel añu 1.993 a partir d´Aguapresión, S.A.. esta empresa asturiana ta empobinada a temes de llimpieces industriales y alcantarilláu, asina como prebes de presión y llimpieces químiques d´instalaciones fabriles. La compañía tien cuatro camiones de llimpieza hidromecánico preparaos pa llabores tan estremaes como la llimpieza de foses séptiques o de la retirada de fuel.