Baxa'l preciu del lleche

A cuatro díes pa la votación del 14 de marzu, sindicatos y colectivos sociales aprovechen la campaña pa denunciar la falta d'interés de los partíos que se presenten por cuestiones d'especial gravedá, como ye'l casu, según COAG-Asturies, de la situación del campu asturianu, que ta en trance de desapaición, al paecer de la organización que dirixe Marino Fernández.

El sindicalista denunció que les propuestes de los políticos nel tema agrariu nun pasen de promeses vacies pa enllenar papeles mientres los fechos demuestren que nun se ta faciendo pol sector. En concreto, Fernández atacó al Gobiernu pola crisis que pasa'l sector de ganadería de lleche, que sufre una baxada de precios que ta poniendo'l productu mui perbaxo de la raya de la rentabilidá. La crisis, que Marino Fernández califica como "la más grave en décades" débese según COAG a la presión de la gran industria llechera, que quier remanar tola cadena de producción del lleche. Pa ser a ello, les grandes compañíes taríen importando lleche d'otros países a precios mui baxos, estrando'l mercáu d'ello y obligando a los ganaderos asturianos a vender el llitru a precios cada vegada más baxos mientres los costes de producción xubieron esti añu una media de 0.03 euros por llitru de lleche.

Como igua a esta situación, COAG-Asturies esixe que s'apaute un preciu mínimu pal lleche que garantice la supervivencia de les esplotaciones, y cree que'l Ministeriu d'Agricultura tendría que controlar l'abusu de les industries sobre los ganaderos. D'otra manera, COAG-Asturies ve que'l Ministeriu ta aplicando dos vares de midir cargando tolos controles de calidá sobre los ganaderos mientres qu'a les baldes de los supermercaos asturianos lo que llega son en munchos casos productos a un preciu que nun cubre nin lo que cuesta'l cartón y que nun entienden como puen pone-yos la pallabra "lleche" na etiqueta.