Baxa la ocupación de cames pol andanciu pero la comunidá sigue en riesgu mediu

|
Baxa la ocupación de cames pol andanciu pero la comunidá sigue en riesgu mediu

A partir del llunes van aplicase indicadores nuevos, desapaecen les cuarentenes y aisllamientos, sacante nel ámbitu sanitariu, y les PCR van ser namás pa casos graves.

La Conseyería de Salú confirmó esti vienres 1.640 casos nuevos de coronavirus diagnosticaos nos últimos tres díes. Comparando colos datos de la otra selmana, el númberu medra nun centenar. El martes pasáu detectáronse 530 contaxos, 589 el miércoles, y 521 el xueves. Nesti períodu finaron 5 persones por mor del andanciu, 2 muyeres y 3 homes, con edaes ente los 76 y los 98 años.

Anguaño, hai 123 pacientes ingresaos con covid en planta y 11 na Unidá de Cuidaos Intensivos. Polo que la ocupación total seya del 3,83% nes plantes hospitalaries y del 3,86% nes UCI. Estos datos asitien a Asturies en nivel de riesgu medio, ye dicir, 2 de 4.

Sicasí, a partir del llunes prósimu van afitase 5 niveles d’alerta basándose nel númberu d’ ocupación de cames, les tases d’ocupación por cada 100.000 habitantes y les tases de nueves hospitaliaciones, tanto en planta y como en UCI. Ye una de les midíes que recueye la Estrategia de Vigilancia y Control frente a Covid-19 tras la fase aguda del andanciu que presentó’l xueves la Conseyería de Salú.

Tamién, desanicia les cuarentenes de positivos asintomáticos y casos leves, amás de les baxes automátiques de siete díes en tolos casos. Y supón l'empiezu d'una "etapa nueva" na que solo van ser necesaries les cuarentenes en casos graves y población vulnerable, ente les que tan les persones mayores de 60 años, inmunodeprimides, embarazaes y personal sanitario.

A la población que nun cumpla estos criterios, nun se-yos va facer siquiera prueba diagnóstica, anque se-yos encamienta reducir el contactu social. Sí van ser obligatorios los aislamientos n'hospitales y residencies de mayores. Nestos centros, ensin tener en cuenta la gravedá y los síntomes, van ser de, a lo menos, cinco díes tanto pa residentes como pa trabayadores. Tampoco va ser necesario facer cribaos en centros sanitarios enantes del ingresu o enantes de delles pruebes médiques.

Contador Estadistiques