Barcos peligrosos n'Asturies

Dende la catástrofe del Prestige, tres barcos vieyos y con problemes técnicos anduvieron pelos puertos asturianos carretando mercancíes peligroses ensin causar alarma. La llista entamola va dellos meses el Nikolas, un petroleru monocascu de trenta años d'antigüedá qu'entró al puertu d'El Musel a descargar hidrocarburos pa la terminal de petróleos de Xixón. Con delles revisiones técniques ensin pasar y baxo bandera de conveniencia panameña, el Nikolas abría una riestra na que la compañía Loxística d'Hidrocarburos punxo'l mes pasáu al petroleru "Alcudia", que la CLH mandó a facer la ruta de la costa cantábrica ente Bilbao y A Coruña con escala n'El Musel depués de que la nave vertiere galipote nuna playa gaditana y énte la rocea que xeneraba toles selmanes nes Islles Baleares, antigua ruta del barcu, tamién monocascu y con ventitres años d'antigüedá.

Xunta estos dos barcos hai que poner tamién al Aramo, un quimiqueru de 6.305 tonelaes y nome asturianu que la Naviera Alvargonzález emplega pa llevar alquitran hasta'l Puertu d'Avilés. Con 27 años enriba, l'Aramo retuviéronlu va tres años en Savona (Italia) por fallos en cascu qu'afectaben directamente a la navegabilidá, y a primeros d'esti añu pasó una revisión en Port St Louis (Francia) onde-y sacaron hasta siete fallos, cinco d'ellos del conveniu Marpol, tratáu internacional que controla la seguranza nos barcos. Da la circunstancia que al Aramo, por ser un quimiqueru y tresportar alquitrán, nun-y afecta'l Real Decretu Llei 9/2002 que s'aprebó n'avientu pa torgar la entrada a puertos españoles de barcos peligrosos, ello ye qu'esti RD namás afecta a petroleros y nun contempla l'alquitrán como una de les mercancíes a controlar, siendo como ye un hidrocarburu neto que'l galipote del Prestige. Llama l'atención qu'esti RD tampoco nun afecte al Alcudia, compañeru d'otra riestra de barcos que foron al desguace o acabaron en países del tercer mundu.

Too ello vien a da-y la razón a un estudiu de la Fundación Hogar del Empleado que reconoz que l'Estáu español nun puede facer cumplir llei ninguna pa desaniciar estos barcos porque nun hai barcos seguros y llegales abondos como pa poder cumplir coles necesidaes de tresporte esistentes. Según Fuhem, en mundu hai unos 7.000 barcos peligrosos, y d'ellos 700 entren davezu a puertos españoles