Barbón y l'alcaldesa González visiten el puestu d'Iniciativa pol Asturianu na FIDMA

|
Barbón y l'alcaldesa González visiten el puestu d'Iniciativa pol Asturianu na FIDMA

Iván Llera entregó-y al presidente d'Asturies les actes del seminariu 'Oficialidá. El camín constitucional de futuru pal asturianu'.

El socialista Adrián Barbón visitó esta mañana la LXIII Feria Internacional de Muestres d'Asturies (FIMDA). El presidente de la Cámara de Comercio de Gijón, Félix Baragaño, guiólu xunto cola alcaldesa Ana González Rodríguez pel Recintu Ferial Luis Adaro, visitando dellos puestos.

Ún d'ellos foi'l d'Iniciativa pol Asturianu, asitiáu nel pabellón ferial númberu 3, onde la organización cede espaciu a 14 empreses qu'empleguen la llingua asturiana de manera habitual. Éstes son Ediciones Trabe, Saltadera, CuatroGotes Producciones, Cartonajes Vir, Cerveza Caleya, Círculo Gijón Baloncesto y Conocimiento, camisetes Puru Remangu, La Gijonesa, La Naveta, Nenyuri xestión cultural, Los Caserinos, 9mil Soluciones, Asturcón y Acuto Xuegos.

Barbón conversó con representantes de l'asociación y de dalgunes de les firmes presentes, ente ellos el presidente d'Iniciativa pol Asturianu, Iván Llera, que-y entregó les actes del seminariu 'Oficialidá. El camín constitucional de futuru pal asturianu', celebráu en marzu del añu pasáu nel Edificiu Históricu de la Universidá d'Uviéu. Esti añu, en mayu, tuvo llugar una segunda edición, tamién con una importante participación tanto d'asistentes como de ponentes de primer nivel.

Actividaes diaries

El puestu d'Iniciativa pol Asturianu celebra actividaes de manera diaria. El sábadu, cuando abrió les puertes la Feria, acudió Víctor Suárez pa firmar exemplares de la so torna 'La Rexenta' de Leopoldo Alas ‘Clarín’, mentes qu'ayeri presentóse'l llibru 'Invisible' d'Aique Fernándi.

Pa esta tarde ta prevista la grabación d'un programa de 'Iniciativa pol Asturianu nes Ondes', presentáu por Samuel Gradín. Va comenzar a les 18 hores.

Na semeya, Barbón –segundu pela izquierda–, ente González Rodríguez y Baragaño.

Contador Estadistiques