Barbón sella cola patronal y los sindicatos un gran alcuerdu social pa impulsar la reconstrucción económica d'Asturies

|
Barbón sella cola patronal y los sindicatos un gran alcuerdu social pa impulsar la reconstrucción económica d'Asturies

El presidente del Principáu, Adrián Barbón, suscribió güei con CCOO, UXT y la Federación Asturiana d'Empresarios (FADE) la Concertación pa la Recuperación d'Asturies (CREA), un gran alcuerdu social pa impulsar la reconstrucción económica y superar los desafíos qu'aguarden a la comunidá autónoma, como la transición enerxética. “Esta ye la concertación para encarar la gran tresformación d'Asturies”, sorrayó'l xefe del Executivu. CC OO y UXT tuvieron representaos polos sos secretarios xenerales -José Manuel Zapico y Javier Fernández Lanero, respectivamente- y la patronal pol so presidente, Belarmino Feito.

El documentu sustánzase en 170 páxines con 182 midíes que van movilizar recursos públicos por 640.217.041 euros. Les actuaciones articúlense en cinco grandes exes:

  • Reactivación empresarial.
  • Impulsu a la industria.
  • Midíes sanitaries, educatives y sociales.
  • Midíes llaborales, d'empléu y seguridá.
  • Igualdá ente muyeres y homes.

L'axilización de los procedimientos de tramitación alministrativa y concesión de llicencies, l'aprobación de trés nueves lleis (Calidá Ambiental, de Mecenalgu Cultural y Creativu, y de Turismu) y l'ellaboración d'un plan de movilidá multimodal nel área central son dalgunes de les iniciatives previstes.

La concertación recueye tamién la creación d'una Axencia de Ciencia ya Innovación y la puesta en marcha d'un plan industrial y de midíes de sofitu al sector secundariu pa la so adaptación a los cambeos tecnolóxicos derivaos del procesu de transición ecolóxica y enerxética.

Igualdá

Ente otres novedaes, esti alcuerdu social -el novenu que se robla na historia autonómica- abordó per primer vez al traviés d'una mesa específica la inclusión de midíes pa favorecer la igualdá ente homes y muyeres, una de les prioridaes del Gobiernu d'Asturies.

Otru cambéu ye la vixencia. Al contrariu qu'anteriores pactos, que s'estendíen tola llexislatura, la CREA abarca hasta avientu de 2021, magar el gobiernu, los sindicatos y la patronal se compromen a revisar el conteníu, debatir nueves acciones y vixilar el cumplimientu de les yá previstes. L'oxetivu ye consiguir una concertación viva, adaptable a les circunstancies cambiantes de la situación que tamos viviendo.

El presidente del Principáu anunció que la concertación va sirvir de base pa la negociación presupuestaria y los futuros alcuerdos de reconstrucción. Tamién afirmó que se trata d'un marcu aparente pa la orientación estratéxica de los próximos fondos europeos, fundamentales pa guiar la tresformación económica y social d'Asturies.

 

Na semeya, d'izquierda a derecha: José Manuel Zapico (secretariu xeneral de CC.OO.), Adrián Barbón (presidente del Principáu), Belarmino Feito (presidente de la FADE), Javier Fernández Lanero (secretariu xeneral d'UXT). 

 

Contador Estadistiques