Barbón presume en Madrid de “una defensa clara y valiente del asturianu y eonaviego”

|
Adrián Barbón nos 'Desayunos Informativos' d'Europa Press

“Reformaremos l’Estatutu d’Autonomía”, insistió Adrián Barbón esti llunes nos ‘Desayunos Informativos’, qu’entama en Madrid l’axencia de noticies Europa Press, nel momentu de falar d’asuntos culturales nuna intervención na que reclamó al Executivu estatal una reforma urxente del sistema de financiación autonómica. Presumió de “una defensa clara y valiente del asturianu y eonaviego” por parte del so Gobiernu.

“L’Asturies del 2023 será una Asturies arguyosa de la so historia y cultura”, principió'l presidente esta estaya de la so conferencia entitulada ‘La Asturias del cambio: el paraíso natural de la industria verde y el talento’, na que resumió la tresformación del país nos años últimos y citó los retos principales pa los diez años próximos. “Nun concibo presidir el Principáu y avergonzame del patrimoniu cultural y históricu”, siguió’l socialista, que recordó la conmemoración esta llexislatura de los 1.300 años de la batalla de Cuadonga, del 25 de mayu del 1808 “cuando Asturies declaró la guerra a Napoleón y ehí nació la nuesa bandera” o del 40 aniversariu de Estatutu d’Autonomía.

“Too ello respuende al mesmu afán: conocer y valorar la historia ye la forma más importante de valorar l’autoestima y l’arguyu de pertenencia”. Porque Barbón entiende que’l desdexu pa cola manifestación cultural d’Asturies y les sos tradiciones, incluyíes les llingües d’Asturies, ye propio del que nun confía nesta tierra”.

Por último citó l’ampliación del Muséu de Belles Artes d’Asturies “que se pondrá en marcha esti añu”; “el cuidao del prerrománicu, dalgo único a nivel mundial”; y la promoción del Camín de Santiago y del Camín de los Santuarios, que se “sumen a una defensa que fiximos clara y valiente de la defensa del asturianu y eonaviego. Nun conozo a nenguna sola comunidá que s’aprecie que permaneza cruciada de brazos énte’l riesgu de que se desanicien les sos propies llingües. L’Asturies de la década próxima va superar ensin dulda esi debate. La proteición de les nueses señes culturales asentarase nel consensu social y políticu, y pa ello reformaremos l’Estatutu d’Autonomía”.

Cinco ministros

El Gran Salón Presidencial del Hotel Villamagna, asitiáu na Castellana, acoyó una gran representación política, empresarial, sindical y social pa sentir a Barbón, que reclamó una reforma urxente del sistema de financiación económica. Asina ente los presentes había cinco ministros, la vicepresidenta primera del Gobierno y responsable d’Asuntos Económicos, Nadia Calviño, que presentó l’actu; la vicepresidenta cuarta y encargada de la cartera de Transición Ecolóxica y el Retu Demográficu, Teresa Ribera; el d’Interior, Fernando Grande-Marlaska; la d’Industria, Comerciu y Turismu, Reyes Maroto: y la de Ciencia y Innovación, Diana Morant, amás del presidente del Senáu, Ander Gil, el vicepresidente primeru del Congresu, Alfonso Rodríguez o la delegada del Gobiernu estatal en Madrid, Mercedes González.

Dende Asturies desplazáronse’l vicepresidente y conseyeru d’Alministración Autonómica, Medio Ambiente y Cambiu Climáticu, Juan Cofiño; los responsables de Facienda, Ana Cárcaba; Educación, Lydia Espina; Industria, Emplegu y Promoción Económica, Enrique Fernández Rodríguez; de Salú, Pablo Ignacio Fernández Muñiz; y de Mediu Rural y Cohesión Territorial, Alejandro Calvo, o la delegada del Gobiernu estatal n’Astuires, Delia Alonso, y l’alcaldesa d’Avilés, Mariví Monteserín. Ente’l públicu tamién tuvo presente’l cantante Víctor Manuel, el Padre Ángel o’l secretariu xeneral de la Unión Xeneral de Trabayadores (UXT), Pepe Álvarez.

Contador Estadistiques