Barbón busca nesta llexislatura “un consensu tresversal sobre’l modelu d’oficialidá que más alantre se pueda llevar al Estatutu”

|
Adrián Barbón alderique d'orientacion politica

El presidente Adrián Barbón quier “propiciar un entendimientu ampliu que faiga posible evitar la desapaición d’ún de los elementos más preciosos del nuestru patrimoniu cultural”, apuntando que “nesta llexislatura tenemos la oportunidá de que se llogre”. “Hemos buscar un consensu tresversal sobre’l modelu d’oficialidá que más alantre se pueda treslladar al Estatutu”, añadió.

L’alderique d’orientación política, el primeru qu’afronta Barbón, arrancó esta mañana col discursu del presidente. Nel mesmu’l socialista emplegó l’asturianu y el gallego-asturiano nel cachu que dedicó a la cultura.

En total foron 2 minutos y 35 segundos nes dos llingües propies del país. “Vamos dexanos d’esparabanes y sobreactuaciones por cuenta del asturianu y del gallego-asturianu. Nun tenemos qu’usar la nuestra llingua pa dividir, pa encerrizar una crispación que nun tien razón de ser. El mio Gobiernu quier lo contrario, propiciar un entendimientu ampliu que faiga posible evitar la desapaición d’ún de los elementos más preciosos del nuestru patrimoniu cultural. Nesta llexislatura tenemos la oportunidá de que se llogre. Hemos escaecer les provocaciones y buscar un consensu tresversal sobre’l modelu d’oficialidá que más alantre se pueda treslladar al Estatutu”, treslladó a los diputaos presentes na Xunta Xeneral.

“Ési va ser el camín del mio Gobiernu. Mentanto, vamos siguir avanzando”, añadió Barbón, que rescampló les “pruebes pa la certificación de los niveles de Llingua Asturiana, con una bona acoyida”, la formación del Conseyu de la Cultura d’Asturies “que queremos constituyir nel mes d’avientu”, o la recuperación del Circuitu de les Artes Escéniques, “a los que se sumaron los de la Lliteratura, Música, Artes Plástiques y Visuales y, p’acabar, el de Cultura Tradicional”.

Por últimu, apuntó que “as mías apelacióis al arguyo de pertenencia básanse tamén na gran riqueza del noso patrimonio y na potencia dos nosos creadores. Señorías, a cultura asturiana vive un gran momento y temos que fer el posible pra catalizallo. Por eso, entre as medidas tomadas pra paliar os daños da COVID tamén incluimos úa llinia específica de 500.000 euros pr’axudar a autónomos y trabayadores por conta propia del mundo cultural”.

L’asturianu, “seña básica” del nuesu patrimoniu

Barbón tamién nomó a la llingua asturiana n’otra parte del discursu. Foi nel entamu, cuando faló de la formación del so Gobiernu: “Cola recuperación de la Conseyería de Cultura enfatizaba, en fin, la relevancia d’esta materia y, en particular, de la proteición del nuestu patrimoniu cultural, col asturianu como seña básica”.

Semeya obra d'Armando Álvarez.

Pa ver la intervención completa en videu has calcar equí.

Contador Estadistiques