Bandurria Asturiana en Portugal

El músicu y investigador asturianu Daniel García de la Cuesta viaxa esti fin de selmana a Portugal pa participar nun festival nel país luso.

Daniel García de la Cuesta lleva bien d'años investigando les característiques, la historia y la forma de tocar esti casi olvidáu instrumentu asturianu, amás de ser vigulinista del grupu "Lliberdón". Tres dellos años de trabayu empieza haber dalgunes persones interesaes nel so deprendizaxe, el mesmu Daniel pon clas d'esti instrumentu na Escuela de Música Tradicional Asturiana la Quintana de Xixón. Esti trabayu lleva a participar a De la Cuesta en festivales como esti "Festival dos Caminhos da Transumância - Chocalhos 2003". El festival centráse na cultura, música y instrumentos de los pastores que recorríen aquelles zones, poro tamién va falase d'otros instrumentos averaos a la cultura del pastoréu como puen ser la Gaita de Foles o'l rabel cántabru. A lo llargo del Festival Daniel García va dar dalgún conciertu cola bandurria amás d'una conferencia sobre l'instrumentu. Pa conocer más coses del Festival pue visitase esta web, y pa saber más sobre la bandurria asturiana equí ufiertámosvos un testu sobre l'instrumentu fecho pol propiu Daniel García.