Australia recibe a España col Himnu de Riego

Naide nun contaba con que la inauguración de la final de la Copa Davis acabare n'espolín diplomáticu ente Australia y España, dos estaos con rellaciones candiales enforma hasta agora. La sorpresa foi morrocotuda cuando, colos xugadores formando na pista, el trompetista Fred morrison entamó coles primeres notes d'un himnu español que, anque solemne, sonaba bien raro. Según evolucionaba la melodía, los acordes iguaben, en cuenta de la marcha real, l'inconfundible Himnu de Riego, que foi efectivamente himnu d'España...na república. Énte'l plasmu de los xugadores, que nun se movieron de la pista, el secretariu d'estáu de deportes Juan Antonio Gómez Angulo, l'embaxador d'España en Camberra, José Ramón Barañano salieron escopetaos a pidir esplicaciones. El Gobiernu español dixo que lo socedío yera una ofensa y que diba poner una quexa formal.

Los australianos disculpáronse con una carta na que dicen que l'error foi por culpa d'un CD que-y pasaron al trompetista colos himnos nacionales y que venía cambiau y ofreciéronse a repetir los himnos mañana y pasao en compensación. Ente les reacciones al "acontecimientu" rescampla la de Josep Lluis Carod Rovira. El políticu catalán dixo con abonda socarronería, que la canción yera mui guapa y que la pena foi que'l trompetista nun la interpretare bien. Pues ver el vídeu de lo que pasó na web de Tele 5