Atentáu contra'l patrimoniu en Salas: l'alcalde pide "cautela", pero la panera yá cayó

El Conceyu ta revisando l'espediente y munchos ciudadanos amuesen la so indignación énte esta perda.

El valtu ye de va dellos díes, pero un videu grabáu por un vecín fíxose viral nes hores últimes, provocando sorpresa y refugu. Nella vese como una pala escavadora tira una conocida panera en Salas que, presuntamente, nun taría catalogada.

"Los distintos servicios téunicos municipales tán estudiando tola documentación y a ver cómo s'alcuentra esti espediente pa poder dicir claramente dalgo sobre esta situación", espresó l'alcalde de Salas, Sergio Hidaldo, al programa 'Conexión Asturias' de TPA. "Nesa zona del ríu ta tramitándose, y ta aprobáu definitivamente, un estudiu de detalle nel que yá va contemplada la desapaición de la panera y los distintos órganos que tienen qu'informar d'esi estudiu detalle tán colos informes favorables. Sicasí, pido prudencia. Dende los distintos servicios téunico ta evaluándose cómo ta la situación y la información qu'hai sobre esi espediente", añadió sobre'l plan urbanísticu pa esi asitiamientu.

Les imáxenes del valtu impresionaron a munchos usuarios que les vieron en redes sociales, que nun tardaron n'amosar la so indignación, definiéndolu como un atentáu contra'l patrimoniu. La Direición Xeneral de Patrimoniu Cultural va revisar l'actuación sobre la panera de Salas.

Avísenme de qu’esti atropellu a la cultura asturiana y al paisaxe de Salas asoceció va alredor de 20 díes…Según me dicen van facer pisos nel llugar. L’alcalde @SergioHidalgoA_ igual pue danos esplicaciones del papel del Ayuntamientu. Siguir viendo esti tipu d’acciones en 2024… pic.twitter.com/q4YIbGbdBa

— Inaciu Galán (@inaciugalan) March 18, 2024