Asturies.com, primer resultáu en Google

Google, el buscador más importante de la internet, xubió na so última actualización a Asturies.com como la primer opción cuando se-y entruga pol nuestru país. Hasta agora, Google yá daba como primer entrada Asturies.com cuando se buscaba por "Asturies" pero dende esta selmana, Asturies.com sal tamién como primer opción cuando se busca en castellanu entrugando por "Asturias". Con ello, Asturies.com queda, na particular xerarquía de busca de Google, penriba de los grandes medios de comunicación del país y tamién de les webs oficiales del principáu

En cuantes que Google xerarquiza les direcciones d'internet d'alcuerdu al tráficu que mueven y tamién pol númberu d'enllaces qu'apunten a elles dende terceres páxines esti datu demuestra la popularidá d'Asturies.com na rede.

Dempués de siete años n'internet, que se cumplieron el pasáu mes de febreru, los trés primeros como selmanariu y de va cinco p'acá como diariu, Asturies.com ye una realidá afitada que va espoxigando pasín ente pasu ente les webs más conocíes del país. Nesti sentíu, los últimos partes mensuales de la oficina de Xustificación de la Difusión (OJD) dan-y a Asturies.com una audiencia de más de 64.000 visites al mes, con una media diaria de más de 2.000 visites a la portada y una cantidá de páxines descargaes al mes penriba de les 300.000, datos tos ellos que tenemos d'agradecé-y al públicu que cada día entra n'Asturies.com. Va por vos.