Asturies yá ta en nivel d'alerta baxu

|
Gráficu niveles d'alerta Asturies a 12 de setiembre

La incidencia acumulada a 14 díes ye menor de 50 y camínase hacia la 'normalidá nueva'. El llunes rexistráronse 15 casos nuevos.

L'actualización d'ayeri confirmaba la entrada d'Asturies nel riesgu baxu que se camentaba col avance de los datos de la fin de selmana por parte de la Conseyería de Salú. Foi'l vienres cuando'l país baxaba la barrera de 50 con 47,90 casos cada 100.000 habitantes, cifra que'l domingu yá taba 42,89 –ayeri baxó a 39,95–.

Ésta ye la cantidá más baxa dende'l 27 d'agostu del añu pasáu, cuando se rexistraba 42,31. D'esta forma Asturies, única autonomía en nivel d'alerta baxu, avanza hacia la 'nueva normalidá', esto ye, hacia los menos de 25 casos cada 100.000 habitantes.

Hai que recordar que, según el criteriu del Ministeriu de Sanidá, estos niveles d'incidencia –inclúi tamién otros indicadores– tien que tar acompañaos de una ocupación hospitalaria inferior al 2 por cientu o d'UCI del 5 por cientu pa pasar de riesgu mediu a baxu, condición que se cumplen en dambos casos n'Asturies. El domingu yera del 2 y del 4,36 por cientu, de manera respeutiva.

Un fináu

A falta de la espublización de los datos oficiales, la Conseyería de Salú informó de la detección de 15 casos nuevos ayeri. Ye 1 menos que'l domingu.

El Serviciu de Salú del Principáu d'Asturies fixo'l llunes 1.996 pruebes de diagnósticu d'infeición activa, polo que la tasa de positividá s'asitió nel 1,4 por cientu. A 7 díes, esti porcentaxe yera enantes de l'actualización del 2,12 por cientu –ayeri baxó al 2,06 por cientu–.

Hai que llamentar la muerte d'una muyer de 93 años cola enfermedá causada pol coronavirus SARS-CoV-2, la 2.063 del andanciu. 44 pacientes tán hospitalizaos en planta con confirmación o sospecha de COVID-19, 9 menos que'l domingu, mentes que la UCI caltién 13 ingresaos.

Na imaxe, gráficu del Observatoriu de Salú n'Asturies con rexistros dende'l 20 d'agostu del 2020 hasta'l domingu.

Contador Estadistiques