Asturies vive un Primeru Mayu diferente que nun pierde la carga reivindicativa

|
Primeru Mayu 2019

Les asturianes y asturianos nun van poder tomar les cais el Primeru Mayu, pero la reivindicación va siguir presente esti vienres, onde les redes sociales van xugar un papel importante. Tolos sindicatos centren el so mensaxe na defensa de lo público.

Nuna situación esceicional provocada por una pandemia, onde la importancia d’una sanidá pública fuerte y de calidá quedó ratificada, el 1 de mayu, Día de los Trabayadores, va reivindicar los servicios públicos, ensin escaecer la necesidá de que la reconstrucción que va siguir al desconfinamientu tenga en cuenta a les persones. Asina, Comisiones Obreres (CC OO) y la Unión Xeneral de Trabayadores (UXT) celebren la xornada baxo’l lema ‘Trabajo y otros servicios públicos: otro modelo social y económico es necesarios’, mentes que la Corriente Sindical d’Izquierda (CSI), la Conferación General del Trabajo (CGT), el Sindicatu Unitariu Autónomu de Trabayadores de la Enseñanza d’Asturies (SUATEA) y la Confederación Nacional del Trabajo (CNT) fáenlo col de ‘Privatizar mata. Defendi lo público, defendi la to vida’, y la Unión Sindical Obrera (USO) con ‘El valor de tu trabajo’.

Énte la imposibilidá de salir a les cais, como tolos años, les redes sociales van xugar un papel fundamental na reivindicación. A lo llargo de la xornada tolos sindicatos van difundir mensaxes y entamar actividaes, tamién esta mesma tarde, como ye’l casu de los mayoritarios, qu’anunciaron un conciertu virtual de 18.30 a 20 hores cola participación de Chus Pedro, Alfredo González, Anabel Santiago, Marta Elola, y Silvidos y Gemidos; un eventu lliterariu con Marta Mori, David Acera, Benigno Delmiro y Juanjo Barral; y curtiumetraxes de Luis Felipe Capellín.

Na semeya, manifestación del añu pasáu en Xixón pol Primeru Mayu.

Contador Estadistiques