Asturies va anovar la rede de fibra óptica p'ameyorar el serviciu

|
Fibra óptica

La Conseyería de Ciencia, Innovación y Universidá va anovar la rede teunolóxica de cable p'ameyorar el serviciu que s'ufierta a los operadores de telefonía y Internet. Ésta da serviciu n’Asturies a 49 poblaciones de 23 conceyos, llegando a 59.000 viviendes y llocales.

El Gobiernu destina 2,5 millones d’euros pa la sustitución d'equipos téunicos de la rede de banda ancha Asturcón (Ástur de Comunicaciones Óptiques Neutres), que s'ufierta a los operadores pa qu'empresten servicios a los usuarios en condiciones d'igualdá y competencia pa incorporar les últimes meyores teunolóxiques, y pal entamu d’un programa d'ampliación, con 2.700 unidaes más nuna trentena de poblaciones. La sociedá de Xestión d'Infraestructures Públiques de Telecomunicaciones del Principáu d'Asturies (XIT) va ser la encargada de realizar l’anovación teunolóxica d'Asturcón, tando prevista la llicitación nos primeros meses del próximu añu, con un periodu d'execución de 18 meses.

Trátase de dir completando'l mapa de fibra óptica y d'anovar equipos obsoletos onde los operadores nun pueden dar serviciu. “L'oxetivu ye ser más competitivos y que los operadores puedan ufiertar más velocidá, que puedan esplegase en zones onde agora nun lleguen y permitir el crecimientu de la rede”, afirmó'l direutor xeneral d'Innovación, Investigación y Tresformamientu Dixital y vicepresidente del conseyu d'alministración de XIT, Iván Aitor Lucas.

“Ye un pasu fundamental pa ponenos nel sieglu XXI y pa sentar les bases de la implantación del 5G n'Asturies”, añadió.

Contador Estadistiques