Asturies tendrá un presupuestu nel 2013 un 1 por cientu menor respeuto al axuste fechu n’agostu

|

Tres un añu colos presupuestos prorrogaos, l’Executivu entrante del PSOE consiguió pautar unes cuentes pal 2013 xunto con IX y UPyD. El proyeutu aprobáu pol Conseyu de Gobiernu ye un 1 por cientu menor respeuto al axuste d’agostu.

Asina, el presupuestu pal añu qu’entra ye de 3.808 millones d'euros, de los que 2.565 millones destinaránse a gastu social, lo que representa un 67 por cientu del total, según confirmó ayeri la conseyera de Facienda y Sector Públicu, Dolores Carcedo, tres entregar el llapiceru de memoria col proyeutu de Llei de Presupuestos Xenerales del Principáu d'Asturies pal 2013 y el de la Llei de Midíes Presupuestaries, Alministratives y Tributaries d'Acompañamientu, al presidente de la Xunta Xeneral, Pedro Sanjurjo. Carcedo esplicó les llinies xenerales de les cuentes pal 2013 señalando que va destinase a inversión 364 millones d'euros y 245, a gastos financieros. La conseyera alvirtió de la difícil comparanza d'estes cuentes con exercicios anteriores, anque indica que s'amenorguen un 6,4 por cientu al respeuto de la prórroga presupuestaria del 2012 y, aproximao, un 1 por cientu en rellación al escenariu del Plan Económicu y Financieru (PEF).

Tres negociar les cuentes hasta ayeri mesmu con UPyD y treslladar el proyeutu a la Xunta Xeneral, los grupos parllamentarios van poder presentar enmiendes a los mesmos. El Plenu nel que van debatise posibles iniciatives de totalidá va tener llugar el vienres 21 d'avientu. Una vegada que'l testu pase esi trámite, yá namás almitiría enmiendes parciales pa proceder a l'aprobación definitiva'l vienres siguiente, 28 d'avientu.

Nesti momentu, Asturies ta xestionada con unos presupuestos prorrogaos de les cuentes del 2011. Naquella ocasión, l'Executivu de signu socialista sacó alantre un proyeutu qu’ascendió a 4.133 millones, de los que 1.070 millones destináronse a inversión. En xineru del 2012, el Gobiernu de Francisco Álvarez-Cascos (Foro Asturias Ciudadano) vio como la cámara asturiana refugaba'l so proyeutu, que fixaba'l techu de gastu en 4.208 millones. Ésti foi’l motivu principal que lu llevó a convocar eleiciones anticipaes.

 

Contador Estadistiques