Asturies ta en nivel d'alerta 2 por temperatures altes per primer vez dende'l 2004

|
La Playa San Llorienzo

Salú activó'l riesgu moderáu'l martes y va caltenelu polo menos hasta'l sábadu.

Dende que se monitoricen los escesos de temperatura, nel 2004, Asturies nun viviera una situación de calor como ésta. De los trés niveles d'alerta afitaos nel 'Plan Nacional de Actuaciones Preventivas de los Efectos de los Excesos de Temperatura sobre la Salud', el país ta dende ayeri nel segundu más altu, el 2, por mor de les provisiones meteorolóxiques que marquen máximes de 30 graos pa estos díes y mínimes de 18.

"Tuviéramos en dalguna ocasión n'alertes 1 pola presencia d'un día o dos d'escesu de temperatures, pero nunca tuvimos cuatro díes con escesu en rellación cola temperatura que s'estima n'Asturies, que son 30 graos de máxima y 18 de mínima", esplicó Mario Margolles, xefe de Vixilancia Epidemiolóxica. Les autoridaes sanitarias aconseyen a tola población que se protexa de les radiaciones solares, tea hidratada y evite'l consumu de bébores alcohóliques, con una especial proteición a la población más vulnerable a la calor, esto, les persones mayores, la reciella y aquellos que sufran enfermedaes cróniques o trabayen al aire llibre.

Na semeya, La Playa San Llorienzo de Xixón esta tarde, onde munchos ciudadanos averáronse pa pegar un bañu y refrescar.

Contador Estadistiques