Asturies supera les 100.000 pruebes feches pa la determinación de la COVID-19

|
Adrián Barbón nel Llaboratoriu de Microbioloxía del HUCA

Les 3.996 pruebes feches ayeri permitió superar les 100.000 dende qu’entamó l’andanciu de COVID-19, convirtiendo a Asturies nún de los territorios onde más se prauticaron. De les mesmes, 65.803 foron por PCR y 36.903 por tests d’anticuerpos, con 2.356 y 896 positivos, de manera respeutiva según los datos del martes.

No que respeuta a les PCR, les más fiables pa descubrir portadores al deteutar l’ARN del coronavirus SARS-CoV-2, Asturies procesara hasta’l 7 de mayu 56.843, lo que supón 55,73 cada 1.000 habitantes, namái superaos nel Estáu por La Rioja (77,25) y Euskadi (57,37), dos zones mui afeutaes pola pandemia, siendo la media estatal de 34,51. Dende entós el ritmu de pruebes foi constante hasta los 65.803 algamaos ayeri que, sumaos a los tests rapidos, permite algamar 102.706.

El presidente Adrián Barbón destacó ayeri, tres superar la barrera de los 100.000, qu’estes cifres “asítianos a la cabeza non sólo d’España, sinón d’Europa”. La esistencia del Llaboratoriu de Microbioloxía del Hospital Universitario Central d’Asturies (HUCA) permite a Asturies el procesamientu de tan altu númberu de pruebes por PCR dende’l momentu qu’apaecieron los primeros posibles casos de COVID-19, dalgo fundamental pa controlar la espansión del coronavirus nel país.

Na imaxe, Llaboratoriu de Microbioloxía del HUCA'l sábadu pasáu na visita de Barbón al llugar. Semeya d'Armando Álvarez.

Contador Estadistiques