Asturies sigue en riesgu mediu pol Covid-19

|

Los datos del andanciu n’Asturies amuesan una subida pequeña de casos confirmaos depués de la fin de selmana, anque les hospitalizaciones van baxando.

El númberu de positivos de Covid-19 dende la última entrega d'información de la Conseyería foi de 1357, repartíos nos últimos cuatro díes en 376 casos el vienres, 303 el sábadu, 272 el domingu y 406 ayeri llunes. Poro, la comunidá sigue en riesgu mediu, ye dicir, nivel 2 de 4. Nos hospitales, hai 129 persones ingresaes cola enfermedá o con sospecha de tenela, 16 d’elles na UCI. Nestos cuatro díes, amás, finaron cinco persones, cuatro muyeres y un home, que teníen ente 81 y 94 años d’edá. En cuantes a los datos de vacunación, el 83,6% de la población asturiana mayor de 30 años tien yá les tres dosis. Destaca la fastera de les persones d’ente 70 y 79 años col 100% de vacunaes, frente al 51,2% de les persones moces ente 20 y 29 años. La Conseyería encamienta a siguir coles midíes de protección y vacunase, y da’l datu de qu’una persona que tenga ente 60 y 80 años tien 22 veces más posibilidaes d’acabar ingresada na Unidá de Cuidaos Intensivos si nun ta vacunada.

Contador Estadistiques