Asturies quita toles restricciones al tener “arrequexada” la pandemia

Ensin aforos, con pistes de baille abiertes y cola obligación única de llevar la mázcara nel interior de tolos establecimientos públicos. Asturies abraza la ‘normalidá nueva’ cola retirada esti sábadu de toles midíes esistentes de proteición frente al coronavirus SARS-CoV-2 al tener la pandemia, “polo menos per agora, arrequexada; contra la parede d’una manera controlada”, afirmó’l presidente Adrián Barbón.

Sicasí recordaba qu’entá “nun podemos dicir que se venciera a la pandemia”, esto ye, “nun finó entovía”. Con una incidencia acumulada a 14 díes de 15,12 casos cada 100.000 habitantes, cifra comunicada na actulización última correspondiente al miércoles, “tocaba adaptar la situación” d’una manera “seria y responsable”.

Asina, el Conseyu de Gobiernu d’esta mañana aprobó eliminar toles restricciones, sacante fumar en terraces y aquelles de calter estatal, esto ye, la obligación de llevar mázcara nel interior de llugares públicos y nel esterior nel casu de nun poder caltener la distancia interpersonal de seguranza de 1,5 metros. D’esta forma los aforos na hostelería amplíense al máximu permitíu na licencia d’apertura y l’ociu nocherniegu va recuperar la barra y la pista de baille.

Les residencies de mayores y los centros de servicios sociales retomen tamién l’actividá ordinaria, anque se caltienen los cribaos a profesionales non vacunados y ingresos nuevos. Mentes, los acompañantes pueden tornar a los centros de salú y los ingresaos n’hospitales contar con visites individuales per unes hores concretes.

Nel ámbitu escolar, l’alumnáu de les diferentes etapes educatives van volver a compartir xuegos nos recreos y los grupos de convivencia estable se caltienen hasta sestu de Primaria.

Na imaxe, Pablo Ignacio Fernández Muñiz, conseyeru de Salú; Barbón; y Rafael Cofiño, direutor xeneral de Salú Pública. Semeya obra d'Armando Álvarez.