Asturies quier liderar a les rexones que puen dexar de ser "oxetivu 1"

L'ampliación de la UE pa contra l'este pue dexar a Asturies ensin munches de les ayudes que recibe anguaño dende Bruseles, y toles fuerces vives de la política asturiana, sobremanera'l gobiernu y los sindicatos mineros, lleven quexándose d'ello dende que s'anunció l'ampliación. Ello ye qu'Asturies ye "Rexón Oxetivu 1" de la UE, condición que se tien cuando la renta per cápita de la rexón ye de menos del 75% de la media de la UE. L'efectu estadísticu de la entrada a la UE de países como Hungría o Rumanía, con PIB mui baxos va baxar la media europea, va facer qu'Asturies pierda la consideración d'oxetivu 1 y con ello bien d'ayudes ente les que rescamplen los fondos mineros.

Asturies nun ye la única rexón europea que pue quedar fuera del carru del Oxetivu 1, anque sí ye una de les que más s'esmolez énte esta posibilidá. Ye por ello que, anque va mes y mediu la UE yá dio anuncia de que la perda d'ayudes nun diba ser total, la Oficina del Principáu d'Asturies en Bruseles garró la iniciativa pa organizar ayeri un conceyu al que convidaron a les demás rexones d'Europa que tan na mesma situación qu'Asturies. El llistáu d'estes rexones, que tuvieron toes representaes na xunta d'ayeri, comprende a Gales, Castiella y Llión, Murcia, Burgeland (Austria), East Finland y Saxonia (Alemaña) y colos sos representantes falaron el Presidente del Principáu d'Asturies, Vicente Álvarez Areces, y el Conseyeru de Xusticia, Seguridá Pública y Rellaciones Esteriores, Francisco Javier García Valledor



Na xunta Areces espreso-yos a los representantes de les otres seyes rexones la propuesta de facer un cume a desarrollar n'Asturies nel que "axuntar planteamientos y tresllada-yoslos a los respectivos gobiernos centrales, los comisarios y al Parlamentu Européu". El cume de rexones que propunxo'l Presidente asturianu tien yá hasta fecha puesta pal 6 de febreru, y tamién oxetivos claros. Ente ellos, apreta-y al Comisariu de Política Rexonal, Michel Barnier pa que defenda una transición per fases nel procesu de retirada d'ayudes.