Asturies queda ensin cronista oficial

La cultura asturiana perdió ayeri a ún de los sos mayores defensores cola muerte, a los 80 años, de Joaquín Manzanares, cronista oficial del país y responsable del Tabularium Artis Asturiensis, la mayor colección d'arte asturianu de toles dómines.

El Tabularium, la gran obra personal de Manzanares, entamá a ser lo que ye anguaño pel añu 1.947, cuando nuna Asturies qu'entovía curaba les mancadures de la guerra un historiador tuvo l'aquello d'andar el país tres d'aquellos monumentos y obres d'arte singulares que peligraben, yá fuera pol espoliu, pola ruina o pola amenaza de los coleccionistes de fuera, qu'arrampuñaben con tolo qu'atropaben. Énte esti panorama, Manzanares dedicose a recuperar tolo que pudo, faciendo, con un gran esfuerzu personal humanu y económicu, una colección que d'otra mabera taríe esgayada en milenta colecciones particulares d'otros países o, cenciellamente, desapaecía pa siempre. L'enfotu de Manzanares por que la so obra tuviere una utilidá pública conozse yá nel nome de la institución que creo pa caltener la colección: tabularium, en llatín "archivu públicu", pero llamentablemente, nunca nun hubo alcuerdu ente la xunta rectora del tabularium, que tenía delles esixencies museográfiques bien clares, y les autoridaes asturianes pa convertir el tabularium nun muséu que, de facese, diba ser únicu. Quiciás esti asuntu vaya ser tamién polémicu agora que falta'l padre de la criatura, y ye que'l Tabularium sigue ensin tener más casa que la propia de Manzanares.

Ello nun quier dicir que'l tabularium tuviere trancáu dafechu. Na so propia casa uvieina del Prau Picón, Manzanares guardaba y enseñaba'l tabularium a quien quixere velo, ufiertando-y al visitante una colección que tien dende materiales de la prehistoria a pieces del sieglu XX, pasando per amuses del arte eclesiásticu de tolos sieglos y elementos etnofráficos de gran valir. La visita al tabularium yá nunca va volver a ser lo mesmo, y ye que'l conocimientu de les pieces ganaba muncho cuando yera'l mesmu Manzanares quien esplicaba la historia de tala portada románica o cuala estatua y de como llegare hasta elli, que dacuando rescató bienes d'interés cutural de los contenedores d'escombru. Sicasí, la nenina de los güeyos de Manzanares foi siempre l'arte prerrománicu astur. Descubridor de los restos de la ilesia Santa María de Bendones, que depués remocicó con bien pocu xacíu Menéndez Pidal, de Manzanares queda tamién pa la historia los testos qu'escribió sobre'l prerrománicu xunta l'investigador alemán Helmut Schlunk.

El profesor de filoloxía y ex-director de l'Academia de la Llingua Asturiana, Xosé Lluis García Arias, espublizó güei nel diariu La Nueva España esti artículu n'alcordanza de la persona de Joaquín Manzanares que reproducimos equí.