Asturies principia a reciclar mediu millón de mázcares diaries

|
Borja Sánchez García n'Olmar

Una allianza empresarial de doce firmes permitirá algamar estos númberos.

Bioquochem, encargada de diseñar primeramente'l procesu de hixenización y esterilización, ye la compañía que lidera'l proyeutu Sistema Presurizáu Antiséptico Industrial y Neutru, qu'algamó'l sofitu del Gobiernu y al que sumó tamién Therman, que punxo a disposición los sos conocimientos, la so fábrica y el so personal pa la esterilización de los mázcares y empaquetáu, y Olmar, que fai la fase final d'esterilización. Güei entamó la producción masiva de mázcares reciclaes pa usu sanitariu, 500.000 diaries, anque podría aumentar hasta'l millón d'unidaes.

Anguaño cuenta coles mázcares recoyíes pol Serviciu de Salú del Principáu d'Asturies (SESPA) pal so reciclaxe, pero los promotores animen a tolos hospitales y personal sanitariu a qu'empiecen cola segregación afayadiza de les mázcares quirúrxiques usaes, en bolses y contenedores separtaos del restu de residuos hospitalarios. Amás, soliciten la collaboración de los usuarios, yá que ye bien importante qu'estos elementos de proteición nun se ruempan al retirales de la cara.

Los promotores d'esta iniciativa tamién falaron con otres comunidaes pa que puedan unviar estos dispositivos usaos pal so reciclaxe. L'oxetivu ye dotar de mázcares a los centros que lo precisen de tol Estáu nesta llucha contra la pandemia de coronavirus SARS-CoV-2, cola participación tamién de les instalaciones que Therman tien n'Huelva, Montilla, Sant Andreu de la Barca, Puertollano y Fátima (Portugal), y la cesión d'espacios por parte de la empresa Macoga n'Ordes y MDA en València.

Normagrup, Inoxnalón, Tecnoenvases Álvarez, Asturiquimia, Proquiman, Inmicrosa, Ibersa, Grupo Ulma Packaging y Bartusol son les otres empreses que collaboren col proyeutu, amás de l'Asociación de Investigación de Industrias Cárnicas (ASINCAR), Idonial, la Universidá d'Uviéu, Delegación del Gobiernu estatal n'Asturies, l'Exércitu d'España y la Guardia Civil.

Na semeya, nel centru, el conseyeru Ciencia, Innovación y Universidá, Borja Sánchez García, nes instalaciones d'Olmar en Xixón.

 

Contador Estadistiques