Asturies preséntase con puestu propiu nel Foro Transfiere de Málaga como territoriu innovador

|
Puestu d'Asturies en Transfiere

Ye ún de los principales alcuentros europeos sobre ciencia, teunoloxía y innovación.

Dende güei y hasta'l vienres celébrase nel Palacio de Ferias y Congresos de Málaga la decimosegunda edición de Transfiere European Meeting on Sciencie, Technology and Innovation, cola participación más de 200 entidaes, empreses y alministraciones públiques y 420 ponentes, con 39 estaos representaos. Asturies acude per primer vegada con puestu propiu pa presentar los sos programas d'I+D+i, la so Estratexa d'Especialización Intelixente (S3) y la so ufierta como territoriu.

La delegación asturiana ta encabezada pola Conseyería de Ciencia, Innovación y Universidá, y el Centro Europeo de Empresas e Innovación (CEEI), y complétenla la Universidá d'Uviéu, la Fundación para la Investigación Biosanitaria en Asturias (FINBA), los centros teunolóxicos Idonial, CTIC y Asincar, Cluster TIC y Clúster Ecco, y la empresa UpIntelligence. Mentes, el stand asturianu ta dedicáu a la Estratexa d'Especialización Intelixente y pretende posicionar a Asturies como territoriu innovador, con un completu programa d'ayudes pa favorecer la innovación empresarial y el crecimientu de compañíes emerxentes o startups, filiales o spinoffs y firmes de base teunolóxica.

Debuta en Transfiere de la mano del Gobiernu la Universidá d'Uviéu, que busca poner en valor el potencial de los sos grupos d'investigación y les cátedres empresariales y institucionales.

Cinco espacios

El Foro Transfiere estructúrase en cinco espacios principales: Science Room, Innovation Room, Research Center, Ágora y Andalucía Knowledge. Estos trés díes va aldericase sobre tresferencia de conocimientu, el papel de les alministraciones públiques y les universidaes y los centros teunolóxicos, y, amás, van tratase temes venceyaos a los fondos europeos, les enerxíes llimpies o la función de les plataformes teunolóxiques del ámbitu enerxéticu.

El direutor xeneral d'Innovación, Investigación y Tresformación Dixital, Iván Aitor Lucas, participa na primer xornada con una ponencia sobre l'apuesta d'Asturies pola collaboración público-privada nel marcu de la compra pública innovadora. Mañana va falar d'Asturies como paraísu pa innovar nun panel xunto con representantes de los gobiernos d'Andalucía, Comunidad de Madrid, Euskadi, Estremaúra y Canarias.

El país va contar tamién con un panel temáticu'l vienres baxo'l títulu 'Los desafíos pa una Asturies nueva', cola presencia de Lucas y la participación de Cristina Fanjul, direutora del CEEI; Jorge García, direutor de Tresferencia y Cátedres d'Empresa na Universidá d'Uviéu; Faustino Blanco, direutor de Finba; David González, direutor de Desendolcu de Negociu y Estratexa en Fundación Idonial; y Juan Díaz, xerente d'Asincar. Esa mesma xornada, como pieslle de Transfiere, la direutora del Institutu de Desendolcu Económicu del Principáu d'Asturies (Idepa), Eva Pando, va participar nuna mesa redonda sobre polítiques d'innovación.

 

Contador Estadistiques