Asturies presenta en Fitur los sos recursos pal turismu activu y la práctica deportiva

Los directores xenerales de Comerciu y Turismu y Deporte, presentaron güei en Fitur los recursos de los que dispón Asturies pal turismu activu y la práctica de disciplines deportives.

El decretu nuevu de turismu activu, aprobáu a últimos del 2014, regula la práctica de 57 actividaes distintes nel Principáu, 31 más qu’enantes, ente les que destaquen el saltu base, el snorkel y l’esquí acuáticu.

Zapico destacó que’l Gobiernu d’Asturies va siguir apostando por esti sector turísticu, que na comunidá engloba 140 empreses con profesionales de primer nivel “que faen del Principáu’l destín más completu pa tolos que busquen una ufierta d’estes característiques”.

Pela so parte, José Ramón Tuero señaló qu’a lo llargo d’anguaño Asturies va acoyer una partida d’acontecimientos deportivos de gran atractivu turísticu, ente los que figuren dellos rallis, el Descensu Internacional del Sella, el Descensu del Navia, la Vuelta Ciclista a Asturies y delles carreres de monte.

Na presentación participaron tamién Luis García-Abad, representante de la Fundación Fernando Alonso, y el director d’Unipublic, Javier Guillén, que sorrayó la importancia de les etapes asturianes dientro de la Vuelta Ciclista a España, convertíes yá en cites ineludibles dientro de la ronda española.

La presentación d’Asturies como destín deportivu ye l’actu central de tolos que güei se celebren nel estand del Principáu na Feria Internacional de Turismu.

L’estand d’Asturies en Fitur, que nesta edición dedica un protagonismu especial al 30 aniversariu del turismu rural, va acoyer tola xornada alcuentros ente empresarios asturianos del sector y operadores y axentes. Estes reuniones van facese hasta’l sábadu, día nel que la feria abre les puertes al públicu non profesional.

Dalgunes de les principales cites deportives pa esti añu:

    Ski Race Copa Norte Copa Cantábrica d’Esquí de Monte: 20 y 21 de febreru.
    Campeonatu de Surf Tapia-Salinas: 24 a 26 de marzu.
    VII Mediu Maratón Xixón Villa de Xovellanos: 30 d’abril.
    59.ª Vuelta Ciclista a Asturies: 31 d’abril al 1 de mayu.
    45.u Xubida Internacional al Fitu: 13 al 15 de mayu.
    Campeonatu del Mundu de Duatlón: 3 al 5 de xunu.
    VIII Rally d’Asturies Históricu: 9 al 11 de xunu.
    Campeonatu d’Europa Júnior de Béisbol: 11 al 17 de xunetu.
    III Ultra Trail Desafíu Somiedu: 30 de xunetu.
    80.u Descensu Internacional del Sella: 6 d’agostu.
    59.u Descensu a nadu de la Ría de Navia: 7 d’agostu.
    53.u Rally Princesa d’Asturies: 8 al 11 de setiembre.
    40.u Rally Villa de Llanes: 24 y 25 de setiembre.