Asturies, país convidáu en Bélxica

Asturies ye'l país convidáu especial na edición d'angaño del Festival intercélticu de Les Anthinoises (Liexe - Bélxica), onde va desplazase esti fin de selmana una delegación asturiana formada por cuatro grupos musicales asturianos. La delegación astur ígüenla'l coleutivu Muyeres y los grupos Dixebra, Corquiéu y Niundes. El programa del festival valón, qu'entama mañana y acaba'l domingu, pue consultase enteru na rede.

L'asociación ASBL Noecium Astur formada por asturianos en Bélxica y el Centru Asturianu de Bruseles son los responsables directos de qu'esti añu se convidare a una delegación del país a esti festival, ún de los que más tan espolletando estos años. Precisamente'l grupu de folklore del centru asturianu na capital belga "Puxa Asturias" va ser tamién otru de los convidaos del festival. Xunta les actuaciones Musicales, Les Anthinoises acuta tamién un espaciu pa la cultura del país. Asturies va contar nel festival de les Ardenes con un pabellón propiu nel que asoleyar la cultura y atractivos del país. Cola presencia d'artesanos y esposición de productos asturianos, nel programa d'actividaes propuestes rescampla la presencia de Lisardo Lombardía. El responsable de la casa de discos Fonoastur y miembru del Conceyu d'Estudios Etnográficos Belenos va dar una charra sobre etnografía y aspectos de la cultura asturianes.

La presencia asturiana va repartise a lo llargo de los trés díes del festival, entamando col folk de Corquieu, mientres que'l sábadu repite la xente de Corquiéu y participen tamién el coleutivu Muyeres y Dixebra. Muyeres y Niundes piesllen el festival el domingu coles sos respectives actuaciones.

Dixebra apaecen nel cartel de les Anthinoises como una de les mayores atracciones del festival, nel que participen tamién grupos como'l conxuntu de rock celta ingles Mostly Autumn, el cantante belga Perry Rose y una abondante presencia de grupos y artistes bretones poco conocíos per Asturies ente los que rescamplen el grupu de rock celta Ev, Pascal Lamour, Kaerphilly o Dom Duff.