Asturies ganó a Portugal

La selección masculina absoluta de balonmanu d'Asturies ganó ayeri a la de Portugl nel partíu que se celebró nel pabellón de deportes d'El Quirinal d'Avilés. Más de 4.000 espectadores enllenaron el llugar pa ver xugar al conxuntu de Falo Méndez, qu'a los pocos minutos d'entamar yá llevaba una ventaya siempre penriba de los 3 goles a los lusos, llegando en dellos intres a ventayes d'hasta seyes tantos. Los portugueses, que xugaron mui bien a la defensa, fallaron muncho n'ataque, anque los porteros asturianos atayaron munchos de los sos disparos. El nivel de la selección asturiana, estrada de xugadores de lliga Asobal, foi mui altu, rescamplando l'aportación d'Alberto Entrerríos. El xugador del Cáceres compartió, por primer vegada na historia, equipu col so hermanu Raul, que xuega nel Ademar-Llión. Alberto Entrerríos, que marcó 3 goles, ye ún de los dos asturianos que xueguen cola Selección Española xunta Rubén Garabaya. Al acabar la primer parte, la espulsión de Raul Entrerríos enfrió a Asturies y Portugal púnxose a tirude tres, y anque na segunda parte Portugal intentó amarrar meyor la defensa, Asturies plantose en mediu de la pista y enanchó diferiencies hasta llegar al 27-18 del final, un resultáu que-yos escoció a los portugueses, que tan preparando l'européu y nun contaben con perder por un resultáu tan gordu.

El nivel altísimu de la selección asturiana demuestra la potencia del país nesti deporte, pero dende que'l Sporting de Xixón desfizo la estaya de balonmanu, Asturies nun cuenta con un equipu punteru nesti deporte, que tien n'España cola lliga Asobal una de les meyores competiciones d'Europa. D'otra manera, esta foi la única ocasión pa ver esti añu una selección asturiana, en cuantes que nun va haber partíu de fútbol nin tampoco de hoquei, que yera la otra posibilidá que trabayaba la Dirección de Deportes. L'argumentu oficial, la falta de perres, anque la engarrada del añu pasáu ente Federación de Fútbol y Principáu de tamién influyó na desconvocatoria d'esti añu. La posibilidá queda abierta pal 2.004