Asturies fraya con seis meses de medra del paru al rexistrar un descensu de 1.064 persones

|
Camarera paru

L’aumentu continuu del paru que venía produciéndose dende agostu frenó en marzu, cuando Asturies rexistró un descensu de 1.064 desemplegaos pa poner el total de demandantes de trabayu en 84.717. La baxada nel mes pasáu nel país foi del 1,24 por cientu, dalgo menor que la media estatal, que quedó nel 1,48 por cientu.

Asturies pon fin asina a seis meses de medra del desemplegu provocaos pola segunda y tercer fola de la pandemia de COVID-19. Nesti tiempu perdiéronse 7.419 puestos de trabayu, yá que n’agostu había 77.298 paraos.

A nivel estatal, la baxada de marzu foi de 59.149 persones, que ponen el total de desemplegaos en 3.949.640. Los mayores descensos diéronse en Melilla (3,50 por cientu), Cantabria (3,37) y Galicia (2,43), mentes qu’aumentó’l paru n’Euskadi (0,77 por cientu) y Ceuta (0,02).

En términos interañales, Asturies rexistró un aumentu del desemplegu de 9,38 por cientu, con 7.266 paraos más, mentes que la media estatal foi del 11,31, lo que significa la perda de 401.328 puestos de trabayu. Un mes más los territorios más dependientes del turismu, Illes Balears (32,21 por cientu) y Canarias (23,29), son los más afeutaos, con Melilla (7,46 por cientu) y Estremáura (0,25) como los únicos territoriu con descensu del paru nestos 12 meses.

Aumentu de la contratación y de les afiliaciones a la Seguridá Social

No que se refier a contrataciones, nel país firmáronse 20.415, 5.121 más qu’en febreru, lo que supón un aumentu del 33,48 por cientu. Tamién xubió l’afiliación a la Seguridá Social, en concreto en 1.450 persones, un 0,41 por cientu más.

AdxuntuTamañu
PDF icon Datos del paru marzu 20211.83 MB
Contador Estadistiques