Asturies encabeza per segundu mes el descensu del paru nel Estáu

Per segundu mes siguíu, Asturies lidera’l descensu del paru nel Estáu y enllaza seis de cayida. Si en xunu’l país encabezaba la llista de baxada de demandantes d’emplegu al rexistrar una mengua del 4,57 por cientu, en xunetu repite posición con un 2,66 por cientu, 1.484 persones menos, cuando la media estatal foi del 0,41 por cientu.

El total de paraos queda agora en 54.333, la cantidá más baxa pa esti mes dende l’añu 2008, mentes que nel conxuntu del Estáu asítiase en 2.677.874 al tener 10.968 menos. Estremaúra, con un 1,70 por cientu de descensu, y Cantabria, con un 1,59, son los otros territorios con meyores cifres, mentes que les peores preséntenlos Illes Balears (aumentu del 3,02 por cientu), Euskadi (0,76) y Catalunya (0,49).

El turismu ye’l motor que provoca una mayor mengua del paru, pero tamién hai baxada en tolos sectores d’actividá. Somiedo, con un 24,14 por cientu, lidera la baxada, con Onís (20,69 por cientu), Cabrales (18,03) o Castropol (11,82) con porcentaxes importantes.

A nivel interañal, Asturies tien 4.373 demandantes d’emplegu menos, un 7,45 por cientu, tamién superior a la media estatal, que ye del 7,14 (205.938). Illes Balears ye nesti casu la que presenta un mayor descensu, un 16,65 por cientu, siguíu d’Estremaúra (10,25) y Aragón (9,98), mentes que namái hebo aumentu en Melilla, un 3,24 por cientu.

Tamién líder en contrataciones

El tirón del turismu tamién permitió incrementar les contrataciones n’Asturies, qu’aumenten un 7,37 por cientu, el porcentaxe más altu del Estáu. Son un total de 25.963, polos 24.180 del mes anterior.

No que respeuta a l’afiliación a la Seguridá Social, el país ganó 4.203, una medra del 1,11 por cientu con respeuto al mes anterior, cuando taba en 380.198. Anguaño la cifra total queda en 384.401.

Na semeya, un paisaxe de Somiedo.