Asturies aprueba una ayuda d'emerxencia al pueblu palestín de 100.000 euros

|
Resultáu bombardeos en Gaza

Va destinase a la distribución de cestes de comida a refuxaos na Franxa de Gaza.

La organización UNRWA España, l'axencia de la Organización de Naciones Xuníes (ONX) que trabaya coles persones refuxaes procedentes de Palestina, va recibir d'Asturies una ayuda d'emerxencia de 100.000 euros pa garantizar el derechu a l'alimentación de la población que s'atopa nesti territoriu llueu de los ataques israelinos de mayu qu'acabaron cola vida de 253 persones, de los que 129 civiles y, d'ellos, 66 menores. Estes perres van permitir llegar a 6.592 persones en situación de probeza.

El repartu va facese al traviés de los catorce puntos de distribución d'UNRWA na zona, con prioridá pa les persones más vulnerables y les que perdieron les sos cases polos bombardeos d'Israel. Cada cesta ta compuesta por 25 quilos de farina, dos d'arroz, 1 llitru d'aceite de xirasol, mediu quilu de zucre, 0,8 llitros de lleche, mediu quilu de llenteyes y 1 de garbanzos.

Afeutaos tamién pola pandemia

La situación de probeza cronificada de la población de Gaza viose entá más agravada por causa de los ataques de mayu. Por ello, l'ayuda alimentaria n'emerxencies resulta imprescindible, yá que'l 68 por cientu de los llares ta en situación d'inseguridá alimentaria, esto ye, más de 1,2 millones de persones.

D'igual forma, les restricciones a la movilidá impuestes pola pandemia de COVID-19 amplificaron l'impautu de les condiciones presistentes na economía de Gaza. Los bombardeos israelinos suponen tamién un riesgu pa la contención de la pandemia, daes les condiciones d’apinamientu y falta d'hixene y suministros básicos.

Na semeya, una neña frente a un edificiu valtáu pol fueu israelino.

 

Contador Estadistiques