Asturies acumula trés meses de baxada del paru

|
Trabayadores obra paru

Agostu finó con 335 demandantes d'emplegu menos, un 0,43 por cientu. Nel conxuntu del Estáu aumentó un 0,79 por cientu.

El mercáu llaboral asturianu sigue recuperando puestos de trabayu depués de los peores meses de la pandemia de COVID-19. Per tercer mes siguíu ameyora los datos, dexando'l total de paraos en 77.298; el 18 de mayu con 84.487 rexistróse'l picu d'estos meses y güei hai 4.189 demandantes más que'l 16 de marzu, el primer día del estáu d'alarma, según comunicó'l Serviciu Públicu d'Emplegu del Principáu d'Asturies (Sepepa).

El paru menguó en tolos sectores d'actividad sacante na agricultura y pesca y nel coleutivu de persones ensin emplegu anterior, en dambos sexos y en tolos grupos d'edá a esceición de los menores de 25 años. Como ye habitual nun mes de campaña turística, los conceyos con más visitantes lideraron los descensos porcentuales, anque con datos más moderaos que'l mes pasáu.

Nel conxuntu del Estáu'l númberu de paraos medró en 29.780 pa poner el total en 3.802.814. Lideren los ascensos Iles Balears (3,08 por cientu), Catalunya (2,41) y Melilla (2,37), mentes que rexistren los meyores datos Navarra, con un descensu del 2,69 por cientu, La Rioja (2,13) y Cantabria (1,92).

11.808 más que nel 2019

En comparanza con hai un añu, Asturies tien 11.808 paraos más, lo que supón una medra del 18,03 por cientu, inferior a la media estatal, del 24,04 por cientu (737.010 demandantes d’emplegu más). Illes Balears presenta les peores cifres (89,88 por cientu) con una diferencia amplia con Catalunya (29,41 por cientu), segunda de la llista.

Les afiliaciones a la Seguridad Social son tamién favorables nel país, con un aumentu de 3.505 cotizantes (0,97 por cientu), hasta alcanzar les 363.791 persones d'alta. N'agostu contabilizáronse n'Asturies 21.675 contratos, de los que 1.699 fueron indefinidos.

AdxuntuTamañu
PDF icon Datos del paru agostu 20201.87 MB
Contador Estadistiques